विराटनगरमा मास्कको बिक्री ह्वात्तै बढ्यो

इनेप्लिज २०७१ फागुन २१ गते २:४५ मा प्रकाशित

swine-fluविराटनगर, २१ फागुन । स्वाइन फ्लुको प्रकोपबाट सुरक्षित हुन विराटनगरमा नाकमुख छोप्ने ‘मास्क’ को बिक्री ह्वात्तै बढेको छ ।

श्वासप्रश्वासको माध्यमबाट यस रोगको भाइरसको सङ्क्रमण हुने गरेकाले अधिकांश मानिसले मास्कको प्रयोग गर्न थालेपछि यसको बिक्री बढेको हो ।

मास्क बिक्री गर्ने पसलमा उपभोक्ताको घुइँचो लाग्न थालेको छ । विराटनगरको मुख्य बजारका पसल सञ्चालक सन्तोष साह भन्नुहुन्छ “केही समयदेखि विराटनगरका सबै पसल गरी दैनिक करिब पाँच हजार मास्कको बिक्री भइरहेको अनुमान छ ।”

कतिपय स्थानीय विद्यालय र क्याम्पसले आ–आफ्ना विद्यार्थीलाई मास्क प्रयोग गर्न सूचना जारी गरेपछि स्वभाविकरुपमा मास्क खरिदकर्ताको सङ्ख्यामा वृद्धि भएको हो । विकेभिएमका कक्षा ४ मा अध्ययनरत प्राची झाले मास्क लगाएर मात्र विद्यालय आउन भनेको बताइन् ।

स्वाइन फ्लु रोगको सम्बन्धमा सचेतना फैलाउन विभिन्न स्वास्थ्य संस्थाका साथै विद्यालयबाट विराटनगरमा निकालिएको प्लेकार्डसहितको ¥यालीले पनि सर्वसाधारणलाई मास्कको प्रयोग गर्नेतर्फ आकर्षित गरेको हो ।

वातावरण प्रदूषणका कारण यस रोगबाहेक विभिन्न प्रकारका भाइरसबाट सुरक्षित हुने उद्देश्यले पनि मानिस मास्क खरिद गर्न थालेका हुन् ।

विराटनगर बजारमा हिँडडुल गर्ने बटुवामध्ये अधिकांशले मास्कको प्रयोग गरेको देखिन्छ । यसका साथै मोटरसाइकल चालकका साथै पसलेले पनि मास्क लगाएर नै आफ्नो कारोबार गरिरहेका छन् ।

भारतको विभिन्न राज्यमा स्वाइन फ्लुको प्रकोपको असरबाट नेपाल पनि अछुतो नरहेको अवस्थामा सीमावर्ती विराटनगरका बासिन्दामा यस रोगको सन्त्रास अझ बढी देखिन्छ । भारतबाट सामान बोकेर सयौँ गाडी भित्रिनुका साथै दैनिक १० हजार मानिस सीमाबाट आवतजावत गर्ने गर्दछन् ।

प्रतिक्रिया