आज चितवनको सौराहामा नेपालको पहिलो वन्यजन्तु अस्पतालको शिलान्यास गर्दै मन्त्री आचार्यले वन्यजन्तुको संरक्षण गर्नसके नेपालको स्तर अन्तर्राष्ट्रियस्तरमै महत्वपूर्ण हुने बताउनुभयो ।

मानव जीवनकै लागि पनि वन्यजन्तु आवश्यक रहेको भन्दै उहाँले उनीहरुको स्वास्थ्य सेवाका लागि अस्पताल अति आवश्यक रहेको औंल्याउनुभयो । यसले वन्यजन्तुको संरक्षणमा थप सहयोग पुग्ने विश्वास उहाँको थियो ।

कार्यक्रममा निकुञ्ज विभागका महानिर्देशक टीकाराम अधिकारीले अस्पतालमा घाइते अपाङ्ग र बिरामी वन्यजन्तुको उपचार हुने जानकारी दिनुभयो । विश्व सम्पदा सूचीमा रहेको चितवन राष्ट्रिय निकुञ्ज यहीँ रहेको हुनाले पनि यहाँका वन्यजन्तुको सुुरक्षाका लागि अस्पताल आवश्यक रहेको उहाँको भनाइ थियो ।

करिब रु दुई करोडको लागतमा निर्माण हुने अस्पतालका लागि विभिन्न क्षेत्रबाट एक करोड सहयोगको प्रतिबद्धता आइसकेको सो अवसरमा जानकारी दिइयो । चितवनमा हात्ती, दुर्लभ एकसिङ्गे गैंँडा, पाटेबाघलगायतका संरक्षित वन्यजन्तु रहेका छन् ।