पूर्व–पश्चिम राजमार्ग अन्तर्गत पूर्वी चितवनको खैरहनी पर्साबजारमा उनीहरुले सडक अवरुद्ध गर्दै प्रदर्शन गरेका हुन् । सडक बन्द गर्न थालेपछि प्रहरीले हस्तक्षेप गरेर बाटो खुलाएको थियो ।

आज करिब एकघन्टा सडक अवरुद्ध भएको स्थानीय प्रत्यक्षदर्शीले जनाएका छन् । सो क्रममा प्रहरीले लाठी चार्जसमेत गर्नुपरेको उनीहरुले बताए ।

चैत १ गते खैरहनीको नेपाल आदर्श शिक्षा सदनको होस्टेलमा कठार गाविसका विद्यार्थी १७ वर्षका गौरव बस्नेतको मृत्यु भएपछि तीन दिनदेखि स्थानीयवासीले आन्दोलन जारी राखेका छन् ।

स्थानीय प्रशासनले आफ्नो मागमा सुनुवाई नगरेकाले आन्दोलन नरोक्ने स्थानीय छिमेकी रामबहादुर दाहालले बताउनुभयो ।

उनीहरुले विद्यार्थीको मृत्यु आत्महत्या नभई हत्या भएको आरोप लगाउँदै दोषिमाथि कारबाही गर्न माग गर्दै आएका छन् । पीडितलाई क्षतिपूर्ति दिनुपर्ने उनीहरुको अर्काे माग छ । यसकारण मृतकको शव परीक्षण हुननसकी भरतपुर अस्पतालको शवगृहमा राखिएको छ ।

एसएलसी परीक्षाको तयारीमा रहेका कठार गाविसका कक्षा १० मा अध्ययनरत् विद्यार्थी बस्नेतको चैत १ गते विद्यालयको छात्रावासमा मृत्यु भएको थियो । टि सर्टको पासो लगाएर आत्महत्या गरेको दाबी विद्यालयले गरेको छ । सो विषयमा छलफल गर्नका लागि सोही स्कुलका प्रिन्सिपल विन्दु पौडेल र होस्टेल इन्चार्ज सन्तोष पौडेललाई हिरासतमा लिइएको प्रहरीले बताएको छ । घटनाको विषयमा अनुसन्धान भइरहेको पनि प्रहरीले जनाएको छ ।