पैयूँपाटा वडा नं ६ र ७ का बासिन्दालाई लक्ष्य गरी बन्न लागेको आयोजनाको शिलान्यास गरिएको छ । यो वर्ष सांसद विकास कोषमार्फत छुट्याएको रु १० लाख बजेटबाट काम सुरु भएको हो ।

खानेपानी तथा सरसफाइ डिभिजन कार्यालय बागलुङले निर्माणको जिम्मा लिएको छ । कार्यालयको आर्थिक तथा प्राविधिक सहयोग र स्थानीयको श्रमदानबाट आयोजना बन्न लागेको हो ।

बर्सेनि बजेट विनियोजनको मात्रा बढाएर समयमै आयोजना सम्पन्न गरिने कार्यालयले जनाएको छ । आयोजनाबाट २५० घरधुरी प्रत्यक्ष लाभान्वित हुने उपभोक्ता समितिका अध्यक्ष भवानीप्रसाद रिजालले बताउनुभयो ।

आयोजना क्षेत्रमा ठूला ट्याङ्की र ८० वटा खानेपानी धारा निर्माण गरिने खानेपानी तथा सरसफाइ डिभिजन कार्यालयका प्रमुख पूर्णप्रसाद उपाध्यायले बताउनुभयो । “आयोजना सम्पन्न गर्न करिब रु एक करोड २० लाख लागत लाग्ने अनुमान छ, उपभोक्ता समिति र स्थानीयको सहयोग आवश्यक छ” उपाध्यायले भन्नुभयो । खानेपानी आयोजनाको नाम पैयूँपाटा ६ र ७ को खानेपानी आयोजना राखिएको छ ।

आयोजनाको शिलान्यास गर्दै बागलुङ क्षेत्र नं २ का सभासद् प्रकाश शर्मा पौडेलले विकास योजनाका काममा स्थानीयको अग्रसरता र सहभागिता महत्वपूर्ण हुने बताउनुभयो । आगामी दुई वर्षभित्र आयोजनाको निर्माण सक्ने लक्ष्य लिइएको छ ।
खानेपानी समस्या भाग्दै आएका वडा नं ६ र ७ का बासिन्दालाई आयोजना बनेपछि ठूलो राहत पुग्ने स्थानीय नारायण रिजालले बताउनुभयो । रिजालले भन्नुभयो “धारा भएर पनि पानी नआएपछि स्थानीय पानी लिन टाढाटाढा जान बाध्य छन् ।”