बुधबार, मंसिर १० २०७७
काठमाडौं १६:४०
वासिङटन डिसी 05:55

अनेसास जर्जिया च्याप्टरको ऐतिहासिक पुनर्गठन

इनेप्लिज २०७१ फागुन १३ गते ११:२७ मा प्रकाशित

अमेरिकाको जर्जिया राज्यमा, सन् २००५ मा स्थापित अन्तर्राष्ट्रिय नेपाली साहित्य समाज (अनेसास) जर्जिया च्याप्टर एक ऐतिहासिक बैठक संगै पुनर्गठित भएको छ । अन्तर्राष्ट्रिय नेपाली साहित्य समाजका केन्द्रीय अध्यक्ष पदम विश्वकर्मा र अनेसासका सल्लाहाकार एवं च्याप्टर/आजीवन सदस्य विस्तार समीतिका संयोजक तथा नासाका उपाध्यक्ष बिमल नेपालको बिशेष उपस्थितिमा फेब्रुअरी १५, २०१५ गतेका दिन सम्पन्न उक्त बैठक जर्जिया च्याप्टरका तत्कालिन अध्यक्ष चेतनाथ घिमिरेको निवासमा सम्पन्न भएको थियो । बैठकको संयोजन नेपालीज एसोसिएसन इन साउथ इस्ट अमेरिका (नासा) का पूर्व अध्यक्ष संजीव सापकोटाले गर्नुभएको थियो । 

बैठकमा कन्फेरेन्स कल मार्फत विभिन्न ठाउँबाट धेरै जनाको उल्लेखनिय सहभागिता रहेको थियो भने जर्जियाबाट अम्बिका लोहिनी, गोबिन्द श्रेष्ठ, गीता देवी सापकोटा र नमिता घिमिरे प्रतक्ष्य सहभागी हुनुहुन्थ्यो । सोही बैठकले अनेसासका पधाधिकारीहरुको सल्लाह र सुझाब अनुरुप सर्बसम्बत पुन: चेतनाथ घिमिरेकै अध्यक्षतामा एक कार्यसमिति गठन गरेको छ । कार्यसमितिको उपाध्यक्षमा अम्बिका लोहनी, महासचिबमा किरण ढकाल, सदस्यहरुमा गोबिन्द श्रेष्ठ र गीता देवी सापकोटा सर्बसम्बत चयन हुनुभएको छ । यसै गरी पुनर्गठित अनेसास जर्जिया च्याप्टरको सल्लाहाकारमा संजीव सापकोटा रहनु भएको छ ।

बैठकमा, अनेसासका केन्द्रीय अध्यक्ष पदम विश्वकर्माले नब गठित कार्यसमितिलाई शुभकामना दिदै च्याप्टरको सक्रियता र बिकासको निम्ति आफ्नो निरन्तर सहयोग र समर्थन रहने दृढता ब्यक्त गर्नु भएको थियो । यसै गरी अनेसासका सल्लाहाकार एवं च्याप्टर/आजीवन सदस्य विस्तार समीतिका संयोजक तथा नासाका उपाध्यक्ष बिमल नेपालले च्याप्टरको पुनर्स्थापनाले पुन एकपटक सबैलाई आफ्नो-आफ्नो ठाउँमा एकजुट भएर च्याप्टरको विकासको लागि प्रेरणा र हौसला बढाउने प्रसंसा गर्नुभएको थियो । बैठकमा सहभागी नमिता घिमिरेले सन् २००५ मा स्थापित अनेसास जर्जिया च्याप्टर विभिन्न कारण र कठिनाइहरुले गर्दा निस्क्रिय रहेर पनि आज ठीक दश बर्ष पछि पुन: घिमिरेकै अध्यक्षतामा पुनर्गठित हुनुलाई ऐतिहासिक भएको दाबी गर्नुभएको थियो । कार्यक्रमको अबसरमा स्थानीय समाजसेबी एबं नेपाली साहित्यलाई मायाँ गर्नुहुने गोबिन्द श्रेष्ठले संस्थाको आजीवन सदस्यता ग्रहण गर्नु भएको थियो ।

यसै गरी नव-गठित कार्यसमितिका अध्यक्ष चेतनाथ घिमिरेले अनेसास जर्जिया च्याप्टर मार्फत सम्पूर्ण नेपाली मनहरुलाई समेटी नेपाली साहित्यको जगेर्ना गर्दै सबै माझ लोकप्रिय र ब्यापक बनाउन आफ्नो निरन्तर कोसिस जारी रहने बताउंदै यथासक्य छिटो नवगठित कार्यसमितिलाई पूर्णता दिदै, भाबी योजना र कार्यक्रमहरु सार्बजानिक गरिने पनि बताउनु भएको थियो । जर्जियामा अनेसासको च्याप्टर पुनर्गठनले यस क्षेत्रमा नेपाली भाषा र साहित्यमा थप योगदान पुग्ने बिश्वास लिईएको छ ।

(अनेसास जर्जिया को लागि किरण ढकाल को रिपोर्ट)

प्रतिक्रिया