उहाँले आन्दोलनले मुलुकलाई निकास दिन नसक्ने भएको कारणले वार्तामा आएर सहमति खोज्न आग्रह गर्नुभयो ।

नेपाल प्रेस युनियन धनुषाले आयोजना गरेको पुरस्कार वितरण तथा सम्मान कार्यक्रममा मन्त्री निधिले विपक्षी दलले आन्दोलनको कार्यक्रम गर्नु अहिले सान्दर्भीकसमेत नभएको बताउनुभयो ।

उहाँले प्रक्रियामा गएर संविधान जारी गर्नु र विपक्षीले आन्दोलनमा जानु दुवै सोच अतिवादी भएको कारणले अतिवादी सोचले मुलुकलाई समस्यामा पार्ने बताउनुभयो । उहाँले भन्नुभयो– सरकारमा रहेका दलहरुले प्रक्रियामा गएर संविधान जारी गर्छु र विपक्षीले सडकमा गएर त्यसलाई जलाउछु भन्नु अतिवादी सोच हो । अतिवादी सोचले मुलुकलाई समस्यामा पार्ने र संविधानसमेत दिन सक्दैन ।

मन्त्री निधिले सङ्घीयताको विषयमा देखिएको विवादलाई छलफलको माध्यमबाट निकास खोज्नुपर्ने आवश्यकता रहेको बताउँदै निर्वाचन क्षेत्रको आधारमा समेत प्रदेशको निर्माण गरेर निकास खोज्न सकिने बताउनुभयो । उहाँले सङ्घीयता आए मुलुक टुक्रिन्छ भन्नु अतिवादी सोच बाहेक अरु केही नभएको बताउदै मधेस जनता सदैव राष्ट्रियताप्रति प्रतिबद्ध रहेको बताउनुभयो ।

युनियनका धनुषा अध्यक्ष शैलेन्द्र झाको अध्यक्षतामा भएको सो कार्यक्रममा तराई टाइम्सका कार्यकारी सम्पादक वीरेन्द्र रमणलाई उत्कृष्ट युवा पत्रकारिता पुरस्कार, स्वर्गीय नवलकिसोर साह समाचार लेखन पत्रकारिता पुरस्कार नवलकिसोर यादव र उत्कृष्ट सम्पादन पुरस्कार प्रवीण साहलाई प्रदान गरियो । सो पुस्कारको राशि रु पाँच हजार एक सय रहेको छ । पुरस्कृत पत्रकारहरुलाई मन्त्री निधिले दोसल्ला ओढाई सम्मान गर्नुभएको थियो ।