राकममा निमार्णकार्य चलिरहेको पक्की पुल सम्पन्न नहुँदा सवारीसाधन आवतजावतका लागि सञ्चालनमा ल्याइएको फेरीले यात्रुलाई सास्ती दिई अलपत्र पार्ने गरेको छ । फेरी महिनामा केही दिन चल्छ भने धेरै दिन ठप्प हुने गर्छ जसले गर्दा यात्रुलाई मर्कामा पार्ने गरेको छ । बिहीबार मध्याह्नदेखि बिग्रिएको फेरी अझसम्म चल्न सकेको छैन ।

फेरी बन्द हुँदा आसपासका स्थानीयवासी महँगीको चपेटामा पनि परेका छन् ।

जाजरकोटबाट सुर्खेत पु्ग्न हिँडेका यात्रु जयबहादुर बोहराले फेरीले विगतदेखि नै सताउने गरेको बताउनुभयो । रातिको समयमा यात्रा गर्दा फेरी नचल्दा यात्रु सल्लीबजार र राकममै अलपत्र पर्ने गरेको अनुभव उहाँको छ । आफूहरु झोलुङ्गे पुलबाट हिँडेर वारिपारि गरे पनि खाद्यका सामानहरु वारपार गराउन मुस्किल हुने गरेको अनुभव उहाँको छ ।