इनेप्लिज
२०७१ फागुन ६ गते ४:०० मा प्रकाशित
बेनी (म्याग्दी), ६ फागुन । म्याग्दीमा २.३३ प्रतिशत व्यक्तिमा हात्तीपाइलेको जीवाणु देखिएको छ ।
जिल्ला जनस्वास्थ्य कार्यालय म्याग्दीको पछिल्लो तथ्याङ्कअनुसार कुल जनसङ्ख्यामध्ये २.३३ प्रतिशतमा हात्तीपाइलेको जीवाणु देखिएको जिल्ला जनस्वास्थ्य कार्यालय हात्तीपाइले रोग निवारण कार्यक्रमका फोकल पर्सन घनश्याम सिग्देलले जानकारी दिनुभयो ।
यसैबीच हात्तीपाइले रोग निवारण अभियान २०७१ अन्तर्गत म्याग्दीमा करिब एक लाख जनालाई औषधि खुवाउने लक्ष्यसहित अभियान सुरू गरिएको छ ।
सिग्देलका अनुसार कुल जनसङ्ख्या एक लाख १२ हजार ४३९ जनसङ्ख्यामध्ये दुई वर्षमुनिका बालबालिका, गर्भवती, गम्भीर बिरामी र ज्येष्ठ नागरिकबाहेकलाई औषधि खुवाउने गरी आवश्यक जनशक्तिसमेत तयार गरी प्रचारप्रसारको अभियान सुरु गरिएको छ ।
अभियानअन्तर्गत बेनीनगरपालिका र ३५ गाविसमा औषधि खुवाउन ८३४ स्वयम्सेविका र १५० स्वास्थ्यकर्मी परिचालन गरिने छ ।
विगत ६ वर्षदेखि नियमित खुवाउँदै आइरहेको औषधिबारे गलत भ्रम फैलिएकाले केही वर्ष सामान्य समस्या देखिए पनि पछिल्ला वर्षमा भने लक्ष्यअनुसार नै खुवाइएको जिल्ला अस्पतालका प्रमुख चिकित्सक रोशन न्यौपानेले बताउनुभयो ।
गत वर्ष ९४ हजार ७८४ जनाले सो औषधि खाएका थिए ।
प्रतिक्रिया