क्यानाडाको मन्ट्रियलमा सम्पन्न दोस्रो उच्चस्तरीय उडान सुरक्षा सम्मेलनमा सहभागी संस्कृति, पर्यटन तथा नागरिक उड्डयन मन्त्रालयका उच्चाधिकारीसमक्ष आइकाओका अध्यक्ष तथा महासचिवले सुरक्षा कोषबाट समेत सहयोग उपलब्ध गराइने वचन दिएको मन्त्रालयले जनाएको छ ।
मन्त्रालयका सचिव सुरेशमान श्रेष्ठको नेतृत्वमा उक्त सम्मेलनमा भाग लिने क्रममा नेपाली नीति निर्माता, नियमन निकाय र सेवा प्रदायकको संयुक्त प्रतिनिधिमण्डलले नागरिक उड्डयन सुरक्षाका विषयमा नेपाल गम्भीर रहेको आइकाओलाई प्रस्ट पारेको थियो ।

सम्मेलनले अन्तर्राष्ट्रिय रुपमा उडान सुरक्षालाई थप मजबुत गर्न विभिन्न प्रतिबद्धता जाहेर गरेको छ भने आइकाओले सम्मेलनलाई अत्यन्त सफल सम्मेलनका रुपमा लिएको छ ।

सम्मेलनमा भाग लिई फर्कनुभएका हवाई सुरक्षा महाशाखाका प्रमुख तथा सहसचिव बुद्धिसागर लामिछानेले सम्मेलन नेपालका लागि उपलब्धिपूर्ण रहेको र यसले नेपाली उड्डयन क्षेत्रमा महत्वपूर्ण सहयोग पुग्ने आधार तयार गरेको जिकिर गर्नुभयो । सम्मेलनमा नेपाललगायत विश्वका ११९ देश र ३५ भन्दा बढी सङ्घसंस्थाबाट सहभागिता थियो ।