कावासोती, १८ माघ । नवलपरासीका दुई छुट्टाछुट्टै ठाउँमा धारिलो हतियार प्रयोग गरी दुई जनाको हत्या भएको छ ।

कुमारवर्ती–४ का अन्दाजी २८ वर्षीय दीपेन्द्र पाण्डेको हत्या गरिएको अवस्थामा चालिस किलोमिटर उत्तरतर्फको जङ्गलमा शव भेटिएको इलाका प्रहरी कार्यालय नवलपुरका प्रहरी नायब उपरीक्षक नवराज अधिकारीले जानकारी दिनुभयो । कावासोतीमा होटल व्यवसाय गर्दै आएका पाण्डे शनिवार बेलुकादेखि परिवारको सम्पर्कमा नरहेको बताइएको छ ।

त्यस्तै, आजै बञ्जरियामा बन्चरो प्रहार गरी एक जनाको हत्या भएको छ । बञ्जरिया–५ का ४५ वर्षीय वैजनाथ चौधरीको बञ्चरो प्रहार गरी हत्या भएको हो । चौधरीलाई आफ्नै छिमेकी ४० वर्षीय लीला चौधरीले बन्चरो प्रहार गरी हत्या गरेको प्रहरीले जनाएको छ ।

व्यक्तिगत रिसइवीका कारण चौधरीको हत्या भएको प्रहरीले बताएको छ । हत्या गर्ने चौधरी भने फरार रहेका छन् ।