विराटनगर, १३ माघ । डा मीनेन्द्र रिजालले जनताको अभिमतको कदर गर्दै संविधान बनाउनु नै अहिलेको आवश्यकता भएको बताउनुभएको छ ।

उहाँले आज विराटनगर विमानस्थलमा सञ्चारकर्मीसँग कुरा गर्दैै एकीकृत नेकपा माओवादी एवं मधेसकेन्द्रितलगायत दलले प्रक्रियामा सहमति कायम गरेमा  छिटो संविधान बन्ने स्पष्ट पार्नुभयो ।

सूचना तथा सञ्चारमन्त्री डा रिजालले एमाओवादीलाई सहमतिमा ल्याइने प्रयास  अन्तिम समयसम्म  जारी रहने बताउँदै संविधानसभा चुनावको बहिष्कार गर्ने दलसँग आन्दोलन गरेर जनताको अभिमत नलत्याउन र बाह्रबुँदे समझदारीदेखिको सहयात्रा नत्याग्न एमाओवादीसँग आग्रह गर्नुभयो ।

मन्त्री रिजालले एमाओवादीलगायत दललाई जनताको सार्वभौमसत्तामा विश्वास गर्न आग्रह गर्दैै प्रधानमन्त्रीले एमाओवादीलगायत दलसँग सहमति गर्ने र प्रक्रियाबाट भए पनि संविधान जारी हुने जानकारी दिनुभयो ।