गोरखाबजार, १३ माघ । साँझदेखि रातभर दिनहुँजसो १०० नम्बरमा फोन गरेर प्रहरीलाई जिस्क्याउने, झुठा सूचना दिएर हैरान बनाएको भन्दै जिल्ला प्रहरी कार्यालय गोरखाले चारजनालाई पक्राउ गरेको छ ।

गोरखाका दुईजना, छिमेकी जिल्ला लम्जुङ र धादिङका एक/एकजना गरी चारजनालाई नियन्त्रणमा लिएर थप अनुसन्धान अघि बढाएको प्रहरी निरीक्षक रेशमलाल रेग्मीले जानकारी दिनुभयो ।

सय नम्बरमा मोबाइल वा फोन सेटबाट फोन गर्दा पैसा नलाग्ने भएकाले उनीहरुले बारम्बार लगातार फोन गरेर पुलिस जिस्क्याएको प्रारम्भिक अनुसन्धानबाट खुलेको प्रहरी निरीक्षक रेग्मीको भनाइ छ ।

प्रहरीले पुलिस जिस्क्याएको आरोपमा गोरखा नगरपालिका–४ की सङ्गीता उपरकोटी, केराबारी गाविसका सुकबहादुर विश्वकर्मा, लम्जुङ गैँडा गाविसका कुमार विश्वकर्मा तथा धादिङ धुवाँकोट गाविसकी रीता लामालाई पक्राउ गरेको जनाएको छ । १०० नम्बरमा फोन गरेर जिस्क्याउने, झुठा सूचना दिने अन्यको पनि खोजी भइरहेको प्रहरीले जनाएको छ ।

उनीहरुमध्ये अधिकांशले एनसेल मोबाइल सेवा प्रदायक कम्पनीको सिम बोकेको प्रहरीले जनाएको छ । गत एक वर्षअघिदेखि जिल्ला प्रहरी कार्यालय गोरखामा रहेको आकस्मिक फोन सेवामा जिस्क्याउने, झुठा सूचना दिने फोन आउन थालेपछि प्रहरीले अनुसन्धान अघि बढाएको थियो ।

पक्राउ परेका उनीहरुलाई अनुसन्धान गरेर अबदेखि यस्तो नगर्ने सर्तमा छाड्ने तयारी प्रहरीले गरेको छ । “गल्ती नदोहो¥याउने सर्तमा छाड्छौँ”, प्रहरी निरीक्षक रेग्मीले भन्नुभयो ।