त्रिशूली (नुवाकोट), १० माघ । नेपाली काँग्रेसका केन्द्रीय सदस्य डा प्रकाशशरण महतले आगामी तीन महिनाभित्र संविधानको मस्यौदा जारी हुने दाबी गर्नुभएको छ ।

बागमती अञ्चलस्तरीय गिरिजाप्रसाद कोइराला स्मृति फुटबल प्रतियोगिताको आज त्रिशूलीमा उद्घाटन गर्दै डा महतले एमाओवादी र मधेसवादी दलका कारण तोकिएको समयमा जनताले नयाँ संविधान पाउन नसकेको र अबको तीन महिनाभित्रमा संविधान जारी हुने छ भन्नुभयो ।

उहाँले नेपाली काँग्रेस, नेकपा एमालेलगायत राजनीतिक दलहरु र एमाओवादीको मोर्चाबीच ठूलो मतान्तर नभएपनि विवादित विषयलाई टुङ्ग्याउने पक्षमा एमाओवादी नलागेको आरोप लगाउनुभयो ।

उहाँले खेलबाटै मानिसको सामाजिक, आर्थिक, मानसिक, बौद्धिक विकास हुने भएका कारण अब खेल क्षेत्र सबैको रुची तथा महत्वको विषय भएको बताउनुभयो ।

प्रतियोगितामा बाग्मती अञ्चलका रसुवा, नुवाकोट, धादिङ, काभ्रेका गरी १० टोलीको सहभागिता छ । प्रतियोगिता माघ १९ गतेसम्म जारी रहने आयोजक टाइगर युवा क्लबले जनाएको छ ।