संविधानसभाको बैठक सुरु हुन सकेन

इनेप्लिज २०७१ माघ ९ गते ९:२० मा प्रकाशित

Morcha Meetingकाठमाडौँ, ९ माघ । संविधानसभाको दिउँसो १ बजेका लागि तय गरिएको आजको बैठक अहिलेसम्म पनि बस्न सकेको छैन ।

बैठकमा संविधान निर्माण प्रक्रिया अगाडि बढाउनका लागि प्रश्नावली गठनसम्बन्धी प्रस्ताव प्रस्तुत गर्ने कार्यक्रम रहेको छ ।

गत मङ्गलबारदेखि उक्त प्रस्ताव पेस गर्ने प्रयास भए पनि विपक्षी दलको निरन्तर अवरोधका कारण सफल हुन सकेको छैन ।

माघ ८ मा दलहरुकै विवादका कारण संविधान जारी हुन नसकेको अवस्थामा कसरी अगाडि बढ्ने भन्ने विषयमा सरकारमा रहेका दल र विपक्षी दलले आन्तरिक छलफलसमेत गरेका छन् ।

निरन्तरको विपक्षी अवरोधपछि कसरी अगाडि बढ्ने भन्ने विषयमा सत्तारुढ दल आन्तरिक छलफलमा जुटेका छन् ।

संविधानसभाका अध्यक्ष सुवास नेम्वाङले पनि बैठक कसरी अगाडि बढाउने भन्ने विषयमा परामर्श गरिरहनुभएको छ ।

हालसम्म दलहरुबीच संवाद अगाडि बढ्न सकेको छैन । संविधानसभा भवन नयाँ बानेश्वरमा सुरक्षा जाँच कडा बनाइएको छ ।

प्रतिक्रिया