जाजरकोट, ९ माघ । सुत्केरी भएको तीन दिन बितिसक्दा पनि सालनाल नखसेपछि जाजरकोटको अर्छानी– १ ठारीभौंताकी ३६ वर्षीया कमला बुढालाई दुर्ई दिन पैदलै बोकेर रुकुमको चौरजहारीस्थित मिसन अस्पतालमा पुर्‍याइयो ।

अस्पतालले उनको साल त निकाल्यो तर त्यतिबेलासम्म उनको शरीरबाट निकै रगत बगिसकेको थियो । रक्तअल्पताका कारण उनको स्वास्थ्य अवस्था निकै कमजोर भइसकेको थियो ।

अस्पतालमा ब्लड बैंक नहुँदा उनलाई रगत दिन समस्या पर्यो । तत्कालै राष्ट्रिय प्रजातन्त्रपार्टी नेपाल जाजरकोटको सहसचिव शोभा शाही खत्री, नेपाली सेनाको वीरदल गण गुल्म चौरजहारीमा कार्यरत  सिपाही फिलीप तामाङ र अस्पतालका स्वास्थ्यकर्मी विशाल बुढामगरले रक्तदान गरेपछि उनको ज्यान जोगियो ।

उनी मात्र होइन उनी जस्ता सयौँ बिरामीलाई यसरी नै सेना, स्थानीय बासिन्दा र स्वास्थ्यकर्मीले रक्तदान गरेर ज्यान जोगाइ दिने गरेका छन् । जाजरकोट जिल्ला अस्पताल र चौरजहारीस्थित मिसन अस्पतालमा ब्लड बैंकको व्यवस्था नहुँदा यस क्षेत्रका रगत दिनुपर्ने बिरामी सधैँ समस्यामा पर्ने गरेका छन् ।

केहीले हारगुहार गरेर रगत पाए पनि धेरैले रगत अभावमै ज्यान गुमाउनु परेको स्थानीयवासीको भनाइ छ । पश्चिम रुकुमको मिसन अस्पतालले जाजरकोट, रुकुम र सल्यानका नागरिकलाई सेवा पुर्‍याउँदै आएको भए पनि उक्त अस्पतालमा ब्लड बैंकको व्यवस्था नहुँदा उपचार सेवा जटिल बन्दै गएको अस्पतालका प्रशासन प्रमुख दिलबहादुर गिरीले बताउनुभयो ।

पन्ध्र शय्याको जिल्ला अस्पताल जाजरकोटमा पनि न त सुरक्षित प्रसूति गृह छ, न ब्लड बैंक नै यसले गर्दा उपचारमा निकै समस्या परेको खलङ्गा– ३ का गोविन्द कार्की भन्नुहुन्छ ।

मिसन अस्पताल चौरजहारीका प्रमुख डा अभिजित मिश्रले  सुत्केरी भएर अत्यधिक रक्तश्रावका कारण रक्तअल्पता भएका अथवा सामान्य शल्यक्रिया गर्नुपर्ने अवस्थामा ब्लड बैंक नहुँदा उपचारमा समस्या परेको बताउनुभयो ।

यो अस्पताल निजी रुपमा सञ्चालित सामुदायिक अस्पताल हो । यता जाजरकोट अस्पताललाई पनि ५० शय्याको बनाई सुविधायुक्त बनाउन आवश्यक पहल भइरहेको जानकारी अस्पताल विकास समितिका अध्यक्ष नगेन्द्र शाहले दिनुभयो ।

सरकारले सबै नागरिकलाई सहजरुपमा स्वास्थ्य सेवा उपलब्ध गराउने बताउँदै आएको छ तर जाजरकोट, रुकुम, सल्यान जस्ता धेरै पहाडी तथा हिमाली जिल्लामा अझै पनि ब्लड बैंक नहुँदा उपचार सेवा प्रभावित बन्दै गएको छ ।