विश्वको राजनीतिमा कट्टर शत्रु मानिने अमेरिका र इरानबीच अहिले भित्रभित्रै ‘अप्रत्यक्ष’ वार्ता भइरहेको खुलासा भएको छ। पाकिस्तानका शीर्ष कूटनीतिज्ञ इशाक दारले दुई देशबीच कुराकानी भइरहेको जानकारी सार्वजनिक गरेका हुन्।

एपीका अनुसार वासिङ्टन र तेहरानले एकअर्काका प्रस्तावहरू अस्वीकार गरिरहेको देखिए पनि पर्दा पछाडि भने संवाद जारी रहेको दारले बताएका छन्। इस्लामावादले पहिलो पटक सार्वजनिक रूपमा आफू यी दुई देशबीचको मध्यस्थकर्ता (सन्देश पुर्‍याउने माध्यम) बनेको स्वीकार गरेको हो।

इशाक दारले सामाजिक सञ्जाल ‘एक्स’ (X) मा लेख्दै भनेका छन्, “अमेरिका र इरानबीचको अप्रत्यक्ष वार्ता पाकिस्तानमार्फत भइरहेका सन्देशहरूका आधारमा अगाडि बढिरहेको छ।” यो वार्तालाई सफल बनाउन पाकिस्तानका साथै इजिप्ट र टर्की जस्ता देशहरूले पनि ठूलो सहयोग गरिरहेका छन्।

यसअघि दुवै देशले एकअर्कालाई कडा चेतावनी दिइरहेको बेला, यो संवादको खबरले विश्वभर शान्तिको झिनो आशा जगाएको छ। तर, दुवै पक्षका मागहरू फरक-फरक भएकाले अन्तिम सहमति जुट्न भने अझै चुनौतीपूर्ण देखिन्छ।