अमेरिकाको न्यूयोर्कस्थित लगर्डिया विमानस्थलमा आइतबार राति एउटा भयानक दुर्घटना भएको छ। एअर क्यानडाको एउटा क्षेत्रीय जेट विमान धावनमार्गमा गुडिरहेको बेला एउटा सरकारी गाडीसँग ठोक्किएको हो। यस दुर्घटनामा विमानका दुई जना बिमानचालक (पाइलट)को मृत्यु भएको छ भने कम्तीमा ४१ जना घाइते भएका छन्।

अधिकारीहरूका अनुसार, ‘ज्याज एभिएसन’ द्वारा सञ्चालित यो विमान क्यानडाको मन्ट्रियलबाट न्यूयोर्क आएको थियो। राति करिब ११:४७ बजे विमान धावनमार्गमा ओर्लिएर गुडिरहेको बेला विमानस्थलको सुरक्षा र उद्धार कार्यमा प्रयोग हुने गाडीसँग ठोक्किन पुग्यो। ठोक्किँदा विमानको अगाडिको भाग पूर्ण रूपमा ध्वस्त भएको छ। उक्त गाडी अर्कै एउटा घटनाको उद्धारका लागि जाँदै थियो।

एबिसीन्यूजका अनुसार विमानमा ७२ जना यात्री र ४ जना चालक दलका सदस्य थिए। घाइते भएका ४१ जनालाई तुरुन्तै नजिकैका अस्पतालहरूमा भर्ना गरिएको छ। घाइते हुनेहरूमा ३९ जना यात्री र २ जना विमानस्थलका प्रहरी अधिकारीहरू रहेका छन्। धेरैजसो यात्रीहरू उपचार पछि घर फर्किसकेका छन् भने केहीको अवस्था अझै गम्भीर छ। विमानमा रहेका एक एक्लो बालकलाई सकुशल उद्धार गरी परिवारको जिम्मा लगाइएको छ।

यो घटनापछि लगर्डिया विमानस्थल पूर्ण रूपमा बन्द गरिएको छ। सोमबार दिउँसो २ बजेसम्मका लागि सबै उडानहरू रोकिएका छन् र १८ भन्दा बढी उडानहरूलाई अन्य विमानस्थलतिर पठाइएको छ।

अमेरिकी यातायात सुरक्षा निकायले यस घटनाको गम्भीर छानबिन सुरु गरेको छ। प्रारम्भिक जानकारी अनुसार, विमानस्थलको एयर ट्राफिक कन्ट्रोलर(हवाई यातायात नियन्त्रण)ले गाडीलाई धावनमार्ग काट्ने अनुमति दिएका थिए, तर लगत्तै दुर्घटना हुनुअघि गाडीलाई रोक्न धेरै पटक निर्देशन दिएको आवाज अभिलेखन (रेकर्ड)मा सुनिएको छ। अहिले विशेषज्ञहरूको टोलीले दुर्घटनाको वास्तविक कारण पत्ता लगाउन घटनास्थलमा काम गरिरहेको छ।