मेरिल्याण्ड, अमेरिका । सपनाको देश अमेरिका पुग्ने हरेक नेपालीको मनमा एउटा फरक उत्साह हुन्छ। तर, नेपालका चर्चित कलाकारहरू जब अमेरिकाको मेरिल्याण्ड वा वासिङ्टन डीसी आसपास पुग्छन्, उनीहरूको एउटा निश्चित गन्तव्य बन्ने गरेको छ— राजिव श्रेष्ठको ‘फोटो बैंक स्टुडियो’।

विगत तीन दशकदेखि चित्रग्राहिणी अर्थात् क्यामेराको लेन्स(अक्षिदृश्य)सँग खेल्दै आएका स्थापित छायाचित्रकार (फोटोग्राफर) राजिव श्रेष्ठ अहिले अमेरिकामा रहेर पनि नेपाली कला र कलाकारितालाई आफ्नो तस्बिरमार्फत विश्वमाझ चिनाउन व्यस्त छन्।

नेपालका महानायक राजेश हमालदेखि सुमधुर स्वरका धनी रामकृष्ण ढकालसम्म, सबैको एउटै चाहना हुन्छ— राजिवको चित्रग्राहिणी (क्यामेरा)बाट एउटा व्यावसायिक तस्बिर (प्रोफेशनल फोटो) खिचाउने।

राजिव श्रेष्ठका लागि छायाचित्रकारिता अर्थात् फोटोग्राफी केवल एउटा पेशा मात्र होइन, यो उनको जीवनको अभिन्न हिस्सा हो। उनी भन्छन्, “मैले आफ्नो जीवन नै यो क्षेत्रमा समर्पित गरेको छु। यो मेरो लगाव अझै उत्तिकै जीवित छ।” उनले भारतको मुम्बईमा आफ्ना दाजु राकेश श्रेष्ठसँग व्यावसायिक फोटोग्राफीको विशेष तालिम लिएका थिए। त्यही सीप र साधनाले आज उनलाई अमेरिकामा रहेका नेपालीहरूका माझमा लोकप्रिय बनाएको छ।

भर्खरै मात्र चर्चित गायक रामकृष्ण ढकाल डीसी महानगर क्षेत्रमा पुगेका थिए। त्यहाँ राजिवले ढकालका निकै आकर्षक तस्बिरहरू कैद गरे। आफ्नो तस्बिर देखेर गायक ढकाल आफैँ पनि निकै उत्साहित भए र राजिवलाई विशेष धन्यवाद दिए। ढकाल मात्र होइन, पप गायक नवीन के. भट्टराई र महानायक राजेश हमालले पनि राजिवको स्टुडियोमा पुगेर तस्बिर खिचाउने परम्परालाई निरन्तरता दिँदै आएका छन्।

राजिव भन्छन्, “म कलाकारहरूको इज्जत र सम्मान गर्छु, त्यसैले उहाँहरूले पनि मलाई माया गरेर खोज्दै आउनुहुन्छ। यो मेरो लागि ठुलो उपलब्धि हो।”

राजिव श्रेष्ठको सक्रियता फोटो बैंक स्टुडियो नामक तस्बिर गृहमा मात्र सीमित छैन। नेपाली चाडपर्वहरू जस्तै दशैँ, तिहार, तीज र प्रणय दिवस (भ्यालेन्टाइन डे) का अवसरमा उनी निकै व्यस्त देखिन्छन्। नयाँ प्रतिभाहरूलाई प्रोत्साहन गर्न र नेपाली कलाको प्रवर्द्धनका लागि उनी विभिन्न कार्यक्रमहरू समेत आयोजना गर्ने गर्छन्।

उनले खिचेका तस्बिरहरू सामाजिक सञ्जालमा देखिने बित्तिकै चर्चाको विषय बन्ने गरेका छन्। यसले अमेरिकामा रहेका नेपालीहरूलाई आफ्नो माटो र कलाकारसँग जोड्ने पुलको काम समेत गरेको छ।

त्यस्तै पप सम्राट ओम बिक्रम श्रेष्ठ जस्ता कलाकारहरुका पनि तस्बिर कैद गर्न भएका छन् ।