अमेरिकाका पूर्व राष्ट्रपति जो बाइडेन पोप फ्रान्सिसको अन्तिम विदाइमा सहभागी हुने भएका छन् । बाइडेनको पोप फ्रान्सिससँग सन् २०१५ मा अमेरिका भ्रमणदेखि नै व्यक्तिगत र कार्यगत सम्बन्ध थियो । शनिबार हुने अन्त्येष्टिमा सहभागी हुन भ्याटिकन सिटी जाने भएको बाइडेनको कार्यालयले शुक्रबार पुष्टि गरेको छ ।

पूर्व प्रथम महिला जिल बाइडेन पनि आफ्ना पतिको साथ इटाली यात्रा गर्दैछिन्। पोप फ्रान्सिसले २०१३ मा ओबामा प्रशासनको समयमा पोपको जिम्मेवारी सम्हालेका थिए, तर पूर्व राष्ट्रपति बाराक ओबामा भने अन्त्येष्टिमा सहभागी हुने छैनन्।

राष्ट्रपति डोनाल्ड ट्रम्प र प्रथम महिला मेलानिया ट्रम्प शुक्रबार बिहानै रोमतर्फ प्रस्थान गरेका छन्। अमेरिकी कंग्रेसका द्विदलीय प्रतिनिधिमण्डलहरू पनि पोपलाई अन्तिम श्रद्धाञ्जली दिन रोम जान लागेका छन्।

प्रतिनिधिसभाबाट सहभागी हुने सदस्यहरूमा रिपब्लिकन सांसदहरू स्टिभ स्कालिस (लुजियाना), फ्रेन्च हिल (आर्कान्सस), एन वेगनर (मिजोरी ), जोन जोयस (पेन्सिल्भेनिया), पिट स्टाउबर (मिनेसोटा) र स्कट फिजगेराल्ड (विस्कन्सिन) रहेका छन्। डेमोक्र्याट सांसदहरूमा न्यान्सी पेलोसी (क्यालिफोर्निया), ब्रेन्डन बोयल (पेन्सिल्भेनिया), टम सुओजी र लाउरा गिलेन (न्युयोर्क) रहेका छन्।

सिनेटरहरुमा रिपब्लिकनका सुजन कोलिन्स (मेन), एरिक श्मिट (मिजोरी), माइक राउन्ड्स (साउथ डकोटा) र डेमोक्र्याटका डिक डुर्बिन (इलिनोइ), एड मार्की (म्यासाचुसेट्स) सहभागी हुनेछन्।

पोप फ्रान्सिसको सोमबार ८८ वर्षको उमेरमा स्ट्रोकका कारण निधन भएको थियो। बुधबारदेखि उनलाई सेन्ट पिटर बेसिलिकामा राखिएको छ, जहाँ हजारौं शोकसन्तप्तहरू अन्तिम श्रद्धाञ्जली दिन आइरहेका छन्।

अन्य विश्व नेताहरूमा युक्रेनी राष्ट्रपति जेलेन्स्की, फ्रान्सेली राष्ट्रपति म्याक्रोन, इटालियन प्रधानमन्त्री मेलोनी, बेलायती प्रधानमन्त्री स्टार्मर र अर्जेन्टिनी राष्ट्रपति मील्ले अन्त्येष्टिमा सहभागी हुनेछन्।