डिसी महानगर क्षेत्र । गत सेप्टेम्बर २८ शनिबारका दिन केसी डान्स सेन्टरद्वारा प्रस्तुत कलिवुड नाइट २०२४ कार्यक्रमले ऐतिहासिक सफलता हासिल गर्नुको साथै प्रशंसा नै प्रशंसा बटुल्न सफल भएको छ । दर्शकले मुक्त कण्ठले प्रशंसा गर्दै बिगत बर्ष भन्दा कलिवुड नाइट २०२४ अझ उत्कृष्ट भएको प्रतिक्रिया दिएका छन् ।

पहिलो पटक प्रत्यक्ष लोक दोहोरीको आयोजनाले अझ मनोरंजन प्रदान गरेको दर्शकले बताए । लोक दोहरी गायक भगवान भण्डारी तथा गायिका कल्पना दाहालको प्रस्तुतिले सुनमा सुगन्ध ल्याएको पृष्ठपोषण (फिडब्याक )दिए ।

अधिकांश दर्शकले बिगत बर्ष भन्दा अझ व्यावसायिक ,परिस्कृत ,अझ माझिएको र कुनै खोट लगाउने कुनै स्थान नभएको भन्दै आगामी बर्षहरुमा पनि सहभागिता जनाउने प्रतिक्रिया तत्कालै दिए । साथै अधिकांशले बालबालिकाको अत्यधिक सुन्दर प्रस्तुतीको बर्णन गर्न नै नसकिने बताउदै केसी डान्स सेन्टरले यसलाई कायम राखोस् र निरन्तरता दियोस भन्दै शुभकामना दिए ।

दर्शकहरु अत्यन्तै हर्षित ,खुसी र गदगद देखिन्थे भने सर्वाधिक उत्कृष्टको भएको भन्दै अमेरिकामा यस्ता प्रस्तुति हेर्ने कहिले नपाईएकोमा गर्वको महसुस भएको कार्यक्रम हेरे पछि दर्शकले आफ्ना भनाई राखे । त्यहाँ पहिलो पटक कार्यक्रम हेर्न आएका थुप्रै दर्शकले अमेरिकामा जन्मिएका बालबालिकाहरुको कार्यक्रम हेरे पछि हर्षित भएको र दोश्रो पुस्ताको कमाल जति नै प्रशंसा गरे पनि कम हुने बताए ।

यस बर्ष पनि खचाखच भिड रहेको कार्यक्रममा विशेष आकर्षण मध्ये कै लोक दोहरी गायक गायिका भगवान भण्डारी तथा कल्पना दाहालको प्रस्तुतिले सुनमा सुगन्ध रहन पुग्यो । भण्डारी र दाहालले प्रत्यक्ष लोक दोहोरी गीत प्रस्तुत गर्न अगाडी एक अर्को गीत प्रस्तुत गरेका थिए ।

लोक दोहोरी कार्यकमको अन्त्यमा देउसी गीत लगत्तै राखिएकोले प्रत्यक्ष लोक दोहोरीमा चाहिने र वरिपरि प्रशस्त कलाकारहरुले कल्पना दाहाल र भगवान भण्डारीलाई घेरेर साथमा साथ दिएका थिए । बीच बीचमा लोक दोहरी चल्दै गर्दा नृत्य फरक फरक समूहले नृत्य प्रस्तुती दिएका थिए ।

यस पटक न्यूयोर्कमा बसोबास गर्दै आएकी रेश्मा सुनुवारको पनि बेजोड प्रस्तुती रहेको थियो । उनले वरिष्ठ कलाकारहरुका पुराना गीतहरु प्रस्तुत गर्नुको साथै आफ्ना कालजयी गीत समेत प्रस्तुती गरेकी थिइन् । यस बर्ष फेरि आयोजना गरिएको सुपर मम (महा आमा )हरुको प्रस्तुतिले अझ दर्शकलाई मनोरंजन प्रदान गर्न सफल भएको छ ।

समग्रमा दर्शकहरूले भरपुर मनोरञ्जन गरे भने समयमा सुरु भएकोमा दर्शकहरूले मुक्त कण्ठले केसी डान्स सेन्टरको प्रशंसा गरेका छन् । एक मिनेट पनि ढिलो नगरी समय मै समाप्त हुनु भनेको नेपाली समुदायमा असम्भव र दुर्लभ हुन्छ । कहिले ठिक समयमा आयोजना गर्न सक्दैनन् र हुने नसक्ने उदाहरण यस बर्ष र यस पटक पनि कलिवुड नाइट २०२४ ले सबैलाई आश्चर्य चकित बनाउन सफल भएको छ ।

कलिवुड नाइट २०२४ कार्यकमले अमेरिकामा रहेका नेपाली समुदाय र सम्पूर्ण संघ/संस्था आयोजकहरूलाई राम्रो पाठ सिकाएको छ । र अमेरिका भरिका सबै संघ/संस्थाले यस केसी डान्स सेन्टरले कार्यक्रम आयोजना गरे झैँ कार्यक्रम गरेमा हरेक बर्ष दर्शकहरुको वृद्धि हुने कुरामा कुनै शंका हुने छैन ।

यस बर्ष पनि समयमा केही दर्शकहरु समय मै नआएकोले प्रारम्भको दुर्गा सामूहिक नृत्य हेर्न पाएनन । दर्शकहरू ढिलो पुगेकोले प्रारम्भका उत्कृष्ट प्रस्तुतिबाट चुकेका छन् । कार्यक्रमको शुभारम्भमा दसैँको दुर्गा स्तुति सामूहिक प्रस्तुति सर्वोत्कृष्ट रहेको थियो ।

७ -८ दर्जन भन्दा ज्यादा अमेरिकामा जन्मेका तथा सानैमा अमेरिका आएका बालबालिकाहरूले करिब ६ महिना अगाडी देखि अहोरात्र पूर्व अभ्यास गरेर आत्म विश्वास साथ गरेको प्रस्तुतिले सबै दर्शकलाई भरपुर मनोरंजन दिलाएको छ । केसी डान्स सेन्टरकै बिधार्थी /किशोर/ किशोरीहरूले नेपाली गीतहरूमा गरेको नृत्यहरू कुनै व्यावसायिक नृत्याङ्गना /नृत्य गर्ने कलाकार भन्दा कुनै फितलो थिएन । हरेक प्रस्तुति उतिकै बेजोड प्रस्तुति रहन पुगेको थियो । ३ घण्टा सम्म चलेको उक्त कार्यकममा दोस्रो पुस्ताको प्रस्तुति एक पछि अर्का कार्यक्रम हेर्दा अद्वितीय रहेकोले दर्शकहरु मग्नमुग्ध रहन पुगेका थिए ।

दर्शकहरूले बेजोड प्रस्तुति हेर्दै बीच बीचमा ताली बजाएर सम्मान गरेका थिए । भाषण, सम्मान तथा खादा नओढाउने पूर्व घोषणा गरे अनुसार कार्यक्रम सम्पन्न गरिएको थियो ।

साथै केसी डान्स सेन्टरका संस्थापक तथा संचालक द्वय नविन केसी तथा लुना श्रेष्ठले समेत बेजोड नृत्य प्रस्तुति गरेका थिए । यस पटक पनि सबै जातजातिलाई समेट्दै हिमाल, पहाड र तराईका विभिन्न जातजातिका विशेष गीतहरूमा अमेरिकामा जन्मेका ,केसी डान्स सेन्टरमै सिक्दै गरेका किशोर/किशोरी तथा अन्य कलाकारहरुको प्रस्तुति बेजोड रहेको थियो ।

कार्यक्रम सञ्चालन परशु तिमिल्सिना,रिया श्रेष्ठ, रिचा ढकाल तथा किञ्जल शर्माले गरेका थिए । कार्यकमको सुरुमा र अन्त्यमा केसी डान्स सेन्टरका नबिन केसी तथा लुना श्रेष्ठले स्वागत मन्तब्यको साथै सबैलाई धन्यबाद दिएका थिए ।