नेजाको १७औं साधारण सभाको तयारी अन्तिम चरणमा बोस्टन, (अमेरिका) ।

इनेप्लिज २०८१ जेठ २ गते ९:४२ मा प्रकाशित

नेपाल अमेरिका पत्रकार संघ(नेजा)को १७ औं साधारण सभाको तयारी अन्तिम चरणमा पुगेको छ । म्यासाचुसेट्स राज्यको बोस्टन सहरमा यही मे २५ र २६ मा साधारण सभा हुँदै छ । साधारण सभाका लागि आवश्यक प्रबन्ध मिलाइसकिएको नेजाका क्षेत्रीय संयोजक तथा साधारण सभाका संयोजक सुपेन्द्र बस्नेतले जानकारी दिनुभयो ।

संयोजक बस्नेतका अनुसार साधारण सभा पशुपति नाथ बुद्व फाउन्डेसन अफ न्यू इङ्ल्यान्डको सामुदायिक भवनमा हुनेछ भने साधारण सभामा सहभागी हुने नेजाका सदस्यहरूका लागि कार्यक्रम स्थल नजिक आवासको प्रबन्ध मिलाइएको छ ।

साधारण सभामा सहभागिताका लागि पत्रकार तथा अतिथिहरूलाई लोगान अन्तर्राष्ट्रिय विमानस्थल, बोस्टन प्रयोग गर्दा उपयुक्त हुने संयोजक बस्नेतले जानकारी दिनुभएको छ ।

साधारण सभाको उद्घाटनका अवसरमा उत्तर अमेरिकामा सक्रिय राष्ट्रिय सञ्जाल भएका संघ-संस्थाका प्रमुख, पत्रकारसँग सम्बन्धित संघ-संस्थाका प्रमुख, अमेरिकाका विभिन्न राज्यका हाउस अफ डेलिगेट्स चुनिनुभएका तथा सिटीमा काउन्सिल निर्वाचित नेपाली मूलका नेपाली, नेपाल सरकारका प्रतिनिधिहरूको सहभागिता रहने महासचिव बाबुराम दाहालले जानकारी दिनुभयो ।

यसैगरी, नेजाको साधारण सभामा संघका सदस्यहरूका लागि मे २५ र २६ का निम्ति आवास तथा भोजनको प्रबन्ध नेजाको तर्फबाट मिलाइएको र रजिस्ट्रेसनका लागि प्रतिसदस्य १५० डलर र परिवारसहित सहभागी हुनका लागि २०० डलर शुल्क निर्धारण गरिएको कोषाध्यक्ष जानु पङ्गेनीले बताउनुभयो । साधारण सभामा भाग लिनका लागि सदस्यहरूले मे १७ भित्र रजिस्ट्रेसन गरिसक्नुपर्ने पनि पङ्गेनीले जानकारी दिनुभयो ।

प्रतिक्रिया