विराटनगर,१५ असोज (रासस)ः नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले मुलकमा राष्ट्रिय पार्टी भनेको एमाले मात्र भएको बताउनु भएको छ ।
विराटनगर विमानस्थलमा आज सञ्चारकर्मीहरुसँग संक्षिप्त कुराकानी गर्दै उहाँले राष्ट्रिय पार्टी भएकोले सबैको आकर्षणको केन्द्र र विभिन्न पार्टी परित्याग गरेर प्रवेश गर्ने लहर चलेको प्रष्ट पार्नु भयो । अध्यक्ष ओलीले भन्नु भयो –‘निर्वाचन लड्ने आँट एमाले मात्र गर्छ ,यो रिले रेस होइन म्याराथन दैडिने पार्टी हो ’।
उहाँले यो ढोड्को लौरो टेक्ने पार्टी होइन आफ्नो खुट्टामा भर परेर हिड्ने पार्टी भएकोले आगामी निर्वाचनमा वहुमत ल्याउने दावी गर्नु भयो । पूर्वप्रधानमन्त्री ओलीले एमालेको एजेण्डा भनेको देश , जनता,शान्ति सुव्यवस्था,भ्रष्टाचार नियन्त्रण, विकास र जनताको सेवा एवं हितलाई सम्वोधन गर्ने भएकोले निर्वाचनमा जनताले यसको पक्षमा मतदान गर्ने विश्वास व्यक्त्त गर्नु भयो ।
उहाँले आगामी प्रतिनिधि तथा प्रदेश सभा निर्वाचनमा केही सिटमा अन्य विचार मिल्ने पार्टीहरुसँग सहमती कायम हुने सक्ने बताउनु भयो । एक प्रश्नको जवाफमा अध्यक्ष ओलीले बर्तमान कामचलाउ सरकारले संसद नभएको समयमा दुरगामी महत्वका अध्याधेश ल्याउनु गलत हो भन्नु भयो ।
उहाँले यो सरकारको काम भनेको दैनिक कामकाज सञ्चालन गर्नु र शान्तिपूर्ण ढङ्गले निर्वाचन सम्पन्न गर्नु मात्र भएको विचार व्यक्त्त गर्नु भयो । अध्यक्ष ओली पार्टीले अहिलेसम्म आगामी निर्वाचनका लागि उम्मेदवारहरुको अन्तिम छनौट नगरेकोले वाहिर आएको विभिन्न थरिका हल्लामा कुनै सत्यता नभएको प्रष्ट पार्नु भयो ।
प्रतिक्रिया