विराटनगर,३१ साउन ।प्रदेश नं. १ का मुख्यमन्त्री राजेन्द्रकुमार राईले स्वास्थ्य मापदण्ड पालना गराउना गरी व्यवस्थित रुपमा रथयात्राको प्रबन्ध गर्न प्रदेशस्थित सुरक्षा प्रमुखहरूलाई आज यहाँ निर्देशन दिनुभएको छ ।

उहाँले प्रदेशको धार्मिक तथा सांस्कृतिक परम्पराको रुपमा रहेको राधाकृष्ण रथयात्रा यस वर्ष कोभिड सङ्क्रमणलाई ख्याल गरेर छोटो समयमा सम्पन्न गर्न व्यवस्थापन समिति र सुरक्षा प्रमुखहरूलाई निर्देशन दिनुभएको छ ।

मुख्यमन्त्री तथा मन्त्रिपरिषद् कार्यालयमा रथयात्रा तथा सञ्चालन हुने स्थानका बारे जानकारी लिएपश्चात् मुख्यमन्त्री राईले परम्परा पनि कायम हुने र नागरिकको स्वास्थ्य पनि जोखिम नहुने गरी रथयात्राको व्यवस्थापन गर्न आग्रह गर्नुभयो ।

विराटनगरमा हरेक वर्ष श्रीकृष्ण जन्माष्टमीको भोलिपल्ट भव्य रथयात्रा हुने गर्दछ । उक्त रथयात्रामा मोरङ, सुनसरी, झापा जिल्लाका साथै छिमेकी देशमा भारतका लाखौंको सङ्ख्यामा भक्त्तजनहरू सहभागी हुने गर्छन् ।

राधाकृष्ण मन्दिर व्यवस्थापन समितिले यस वर्ष कोभिड सङ्क्रमणलाई ख्याल गर्दै झाँकीबाहेकको रथयात्रा निकाल्ने तयारी गरेको छ ।

मुख्यमन्त्री कार्यालयमा आयोजित छलफलमा नेपाल प्रहरी, सशस्त्र प्रहरीका प्रदेश प्रमुखसहित मोरङस्थित सुरक्षा अधिकारीहरू उपस्थित रहेको थियो ।