डुङ्डुङी गन्हाउने फोहोरी राजनीतिमा
सुन्छु म जब जब,
उनीहरू “नेता” बनेको
फलानो पार्टीको कुन्नि के जति,
पदमा निर्वाचित भयो रे भनेको
पढ्छु त्यस्तै त्यस्तै समाचारहरू
सुन्छु तिनीहरूका भ्रमित बिचारहरू
अझ त्यस माथि,
सामाजिक सञ्जाल रङ्गाउँदै
देख्छु बधाई र शुभकामनाका खातहरू
अलाप र रागहरूले भरिपूर्ण बातहरू
अनि मेरो ब्रह्मले मै सँग भन्छ
बिचरा उनी पनि गएछन्
फेरी अर्को आँखा देख्ने तर “अन्धो” भएछन्
उनीहरूका सपनाहरू,
जिन्दगीका आशा र विश्वासहरू
आफ्नो मात्र होइन
सन्ततिको उज्ज्वल भविष्य
तारे भिरको टुप्पोबाट
हाम फालेर आत्महत्या गरेछ !
तिनका लाला बाला र आफन्तजनको सपना
पिपलमा ऐजेरु बेरिए जस्तै बेरिए छ
अनि व्यक्त गर्न मन लाग्छ दिलै देखी सहानुभूति
दिन्छु मनमनै राजनीतिक श्रध्दान्जली
व्यक्त गर्दछु समवेदनाका लहरहरू
उनीहरूको आत्माको चिर शान्तिको कामना गर्दै !
पत्रकार, लेखक, गायक, कवि एवम् अन्तर्राष्ट्रिय कलाकार मञ्च अमेरिकाका अध्यक्ष रामप्रसाद खनाल नेपालमा लोक दोहोरी गीतको गायन, विकास र प्रवर्धनका एक कुशल अभियन्ता र स्वयममा पनि बरिष्ठ लोक तथा दोहोरी गायक हुन् । उनी कलाकार, पत्रकार, सङ्गीतकार, रेडियो र टेलिभिजनका कार्यक्रम निर्माता, निर्देशक र सञ्चालक पनि हुन । उनी अमेरिकाबाट प्रकाशित नेपाल मदर डट कमका प्रधान सम्पादक पनि रहेका छन् । हाल खनाल सपरिवार अमेरिकाको भर्जिनिया विन्चेस्टर मा बस्छन् ।
रामप्रसाद खनाल
२०७८ भदौ २८ गते २०:५७ मा प्रकाशित
प्रतिक्रिया