डिसीमा तीन ठाउँमा गोली चल्दा १ महिला तथा २ जना पुरुषको मृत्यु,कैयौ घाइते

अमेरिकाको राजधानी वाशिंगटन डिसीमा गत शुक्रबार ३ ठाउँमा भएको गोली काण्डमा ३ जनाको मृत्यु भएको छ भने कैयौँ जना घाइते भएको प्रहरीले जनाएका छन् । ३ जना मध्ये १ जना महिला तथा अन्य दुई जना पुरुषको गोली लागि निधन भएको छ ।

गत शुक्रबार अगस्त २७ का दिन राती एकै दिनमा उक्त गोली काण्ड भएको हो । डिसी प्रहरीका अनुसार गत शुक्रबार करिब १० बजे डिसीको दक्षिणपूर्वमा गोली चल्दा एक महिलाको मृत्यु भएको बताएका छन् ।

त्यसको एक घण्टा पछि फेरी ११ बजे तिर दक्षिण पूर्व स्थित मिनेसोटा एभेन्यु (मार्ग) को १४०० भवन समूह छेउमा ३ जना मानिसहरूलाई गोली हानिएकोमा एक जनाको चोटपटकको कारण निधन भएको छ ।

फेरी एक घण्टा पछि उत्तरपूर्वको क्वार्ल्स गल्लीमा एक जना मानिसलाई घाइते अवस्थामा पाइएको थियो । करिब २ बजे बिहान उत्तर पश्चिम डिसीमा दुई जना पुरुष तथा एक जना महिला घाइते अवस्थामा प्रहरीले फेला पारेका थिए । दुई पुरुष मध्ये एक पुरुषको घाइते भएको कारण निधन भएको छ ।

त्यसैगरी डिसीको उत्तर पूर्वमा दुई जनालाई छुरा प्रहार गरिएको छ भने अन्य विस्तृत जानकारी प्रहरीले डब्लुटिओपिलाई उपलब्ध गराउने भएको छ ।