मंगलबार, साउन २४ २०७९
काठमाडौं २१:५८
वासिङटन डिसी 12:13

एनआरएन ग्लोबल र सगुन कल्याणकारी परियोजनाहरुमा सहकार्य गर्दै अघि बढ्ने!

इनेप्लिज २०७८ असार ११ गते २२:१० मा प्रकाशित

 

समाचारदाता।भर्जिनिया, अमेरिका । गैरआवासीय नेपाली संघ- एनआरएनए ग्लोबल र सगुनबीच कल्याणकारी परियोजनाहरुमा सहकार्य गर्ने सहमति भएको कुरा दुबै संस्थाद्वारा जारी संयुक्त बक्तब्यमा जनाइएको छ ।

गैरआवासीय नेपाली संघ (nrna.org) तथा संयुक्त राज्य अमेरिकामा मुख्यालय रहेको सामाजिक संजालमा आधारित इकमर्स कम्पनी, सगुन (sagoon.com), बीच आपसी सहकार्य गर्ने बारे एक समझदारीपत्र (एमओयु) मा हस्ताक्षर भएको छ।

समझदारीपत्रमा एनआरएनएले सामाजिक संजालमा आधारित इकमर्स मार्फत नेपाल र नेपाली डायस्पोरालाई विश्वस्तरमा चिनाउन सगुनले निर्वाह गर्दै आएको भूमिकाको प्रशंसा गरेको छ। त्यस्तै प्रवासमा रहेका नेपालीहरुद्वारा शुरु गरिएका नयाँ पुस्ताका स्टार्ट अप कम्पनीहरुलाई प्रोत्साहित गर्न सगुनले सघाउने विश्वास पनि एनआरएनएले व्यक्त गरेको छ।

गैर आवासीय नेपाली संघ र सगुन कल्याणकारी गतिविधिहरुमा सहकार्य गर्ने सम्भावनाको खोजी गर्न पनि सहमत भएका छन्।

“८२ मुलुकहरुमा फैलिएको गैरआवासीय नेपाली संघले आफ्नो स्थापना कालदेखि नै प्रवासमा रहेका नेपालीहरुले शुरु गरेका नवीनतम विचार तथा परियोजनाहरुलाई सघाउंदै आएको छ। अमेरिका जस्तो अत्यन्त कडा प्रतिस्पर्धा रहेको सूचना प्रविधि क्षेत्रमा एउटा विश्वासिलो कम्पनीको रुपमा आफुलाई स्थापित गरेर नेपाल,भारत लगायतका मुलुकहरुमा आफ्नो सेवा विस्तार गरिरहेको कम्पनी,सगुन,संग सहकार्य गर्न पाउँदा हामी निकै खुसी छौं,” गैरआवासीय नेपाली संघका केन्द्रिय अध्यक्ष कुमार पन्तले भन्नु भयो। विश्व ज्ञान सम्मेलन जस्ता कार्यक्रम मार्फत प्रवासी नेपालीहरुसंग रहेको सीप, प्रविधि र पूँजी नेपाल भित्र्याउन संघले काम गरिरहेको पनि उहाँले बताउनु भयो।

यसैगरी सगुनका संस्थापक गोविन्द गिरीले संसारभरि फैलिएका नेपालीहरुको साझा संस्था गैरआवासीय नेपाली संघसंग सहकार्य गर्न पाएकोमा खुसी व्यक्त गर्नु भयो।”अहिले झन्डै पैंसठ्ठी लाख प्रयोगकर्ताहरुले सगुन एप चलाइ रहनु भएको छ र ६५ राष्ट्रहरुबाट ४,५०० भन्दा बढी लगानीकर्ताहरु हामीसंग जोडिनु भएको छ। हाम्रो यात्रामा प्रवासी नेपालीहरुले देखाउनु भएको माया, सहयोग र साथका लागि हामी सधैं आभारी छौं।साथै गैरआवासीय नेपाली संघसंगको सहकार्य दुवै पक्षका लागि लाभदायी हुने हाम्रो विश्वास छ,” उहाँले भन्नु भयो।

सन् २०१५ मा औपचारिक रुपमा शुरु गरिएको सगुनका अमेरिका,नेपाल र भारतमा कार्यालयहरु छन्।सगुन प्ल्याट फर्ममा प्रयोगकर्ताहरुले आफ्नो कथा,फोटो र भिडियो शेयर गर्छन्,आफ्ना साथीहरुसंग कुराकानी गर्छन् र उनीहरुले कमाएको ‘स्मार्ट कोइन’ हरु परिवार र साथीहरुलाई उपहार किन्न खर्च गर्न सक्छन् । थप जानकारीका लागि www.nrna.org र www.sagoon.com मा जानको लागि अनुरोध गरिएको छ।

नेपाल विभिन्न किसिमका प्राकृतिक संकट र महामारीबाट बेला बेलामा आक्रान्त भइरहेको बेला यी दुई संस्थावीच भएका यी सहमतिले नेपाल र नेपालीहरु प्रत्यक्ष रुपमा लावान्भित हुने आशा गरिएको छ।

प्रतिक्रिया