विराटनगर,६माघ।सुनसरी जिल्ला स्थित दुहबी–इनरुवा सडकखण्डमा आज माइक्रोबस र मोटरसाइकल एकआपसमा ठोक्किँदा तीन जनाको मृत्यु भएको छ।दुहबी नगरपालिका–१० स्थित सडकखण्डमा दुहबी बाट ईनरुवा तर्फ जाँदै गरेको प्र १–०२–००१ ज ३८६८ नम्बरको माइक्रोबस र दुहवीतर्फ आउँदै गरेको को ३४ प ४६९४ मोटरसाइकल एक आपसमा ठोकिदा तीन जनाको मृत्यु भएको प्रदेश ट्राफिक प्रहरी कार्यालय इटहरीले जनाएको छ।

दुर्घटनामा मृत्यु हुनेमा मोटरसाइकल चालक सुनसरी इनरुवा– ३ का ४४ वर्षीय बिर्ख मण्डल र माइक्रो बसका सह चालक सप्तरी राजविराज–१ का २२ वर्षीय शंकर यादव रहेका प्रहरीले जनाएको छ।

अर्का मृतकको पहिचान खुलेको छैन भने दुर्घटनामा दश जना सामन्य घाइते भएका प्रहरीले जनाएको छ।

यस सम्वन्धमा आवश्यक अनुसन्धान भइरहेको प्रहरीले जनाएको छ।