सोमबार, असोज ५ २०७७
काठमाडौं १६:४५
वासिङटन डिसी 07:00

कोरोना महामारीकै अर्को युद्ध मैदान अमेरिकाबाट नेपाल र नेपालीहरुको नाममा

रामप्रसाद खनाल, भर्जिनिया अमेरिका २०७६ चैत १० गते २२:५४ मा प्रकाशित

रामप्रसाद खनाल ,

 अलिकति रुघा लागे जस्तो भएको छ, टाउको दुख्ने र अनइजी महसुस पनि भएको छ । म आफै पनि तीन दिन देखी घरमै आइसोलेशनमा बसिरहेको छु । हाल म बसिरहेको देश अमेरिका चाइनाबाट शुरु भएको कोरोना भाइरसको चपेटामा परिसकेको छ । यी पङ्ती लेख्दा सम्म अर्थात् मार्च २३ तारिख बिहान ११ बजे सम्मको पछिल्लो तथ्याङ्क अनुसार ४५९ जना भन्दा बढी अमेरिकनहरूको “रामनाम सत्य” भैसकेको छ भने ३५,१७९ जनामा कोरोना भाइरसको सङ्क्रमण भैसकेको छ । मृत्यु हुने र सङ्क्रमितको सङ्ख्या मिनेट मिनेटमा थपिरहेको देख्दा शङ्कै शङ्का र त्रासले होला सन २०२० नै मेरो अन्तिम वर्ष हुने त होइन भनेर मनमा डर पनि लागिरहेको अवस्थामा छ । मनमा डर पनि किन नलागोस् – संसार भर १५४१९ भन्दा बढीले जिब्रो टोकिसकेका छन् भने ३५३७५९ भन्दा बढी सङ्क्रमितहरू जीवन र मृत्युको दोसाँधमा छन् ।

जति सुकै डराउन्न, आतङ्कित हुन्न भन्दै अरूलाई सान्त्वना प्रदान गर्दै गरे पनि आफ्नै मन भित्रै कता कता कथामा सुनेको यमराज साँच्चै कस्सिएर हामीहरूलाई लिन आएकै त होइन ? जस्तो पनि मनमा उत्पन्न भइरहेको छ । मै हुँ भन्ने देशहरू, संसारका सर्बशक्तिमानहरुको ओठ तालु सुकिसकेका छन् र अहिले संसार पहिलो र दोस्रो विश्व युद्ध पछिको नसोचेको भयङ्कर भाइरस विश्वयुद्धमा फसेको छ ।

मर्ने कसैलाई रहर हुँदैन तर अहिले मान्छे सङ्क्रमित नभएको वा नमरेको सहर विरलै कल्पना गर्न थालिएको छ । संसारका १९३ देश र टेरेटोरीमा कोरोना भाइरस रूपी यमराज छिरिसकेको छ । थाहा छैन यो यमराजले अब कतिको राम नाम सत्य बनाएर छाड्ने हो ।

यो भन्दै गर्दा कसैलाई कति आतङ्कित बनाएको भन्ने लाग्ला तर वास्तविकता यही हो र हामी कोही पनि वास्तविकता बाट भाग्न सक्दैनौँ । कोरोनाले संसार भर महामारी फैलाउँदै मात्र गैरहेको छैन यसले धेरैलाई लैजाने वैज्ञानिक तथा रिसर्चरहरुले अनुमान गरिसकेका छन् जुन दिनदिनै बढी रहेको सँक्रमित र मृत्‍यु सङ्ख्याले पुष्टि गर्दछ ।

सुरुमा चाइनाको बुवानबाट सुरु भएको यो यमराज रूपी कोरोना भाइरस चाइनाले केही समय लुकाउनाले संसारले आज त्यसको चर्को मूल्य चुकाउनु परेको कुरा कसैबाट छिपेको छैन । सुरु सुरुमा लुकाइयो, त्यस पछि अलि अलि बाहिर लिक हुँदा पत्याइएन, हल्ला हो भनियो । चाइना र कम्युनिस्टहरूलाई बदनाम गर्न साम्राज्यवादी अमेरिका र अरू सम्राज्यबादीहरुले गरेको हल्ला र षड्यन्त्र भन्दै अन्य देशका र नेपालका वामपन्थीहरू पनि बोले लेखे, तर अहिले बल्ल बुद्धिको बिर्को खुलेको छ र सबै लकडाउनको अवस्थामा छन् ।

बाध्यता र विवशताले नेपाल बाहिर रहेका म र म जस्ता करिब एक करोड नेपालीहरू ( भारत र अन्य सबै देशहरू गरी संसार भरको अनुमानित आँकडा ) ले नेपाल र नेपालीको हितमा यत्ति केही बोल्यौँ वा लेख्यौँ भने आफ्नै देशलाई लात्त हानेर विदेश जानेले हामीलाई सिकाउने ? तिमीहरू विदेशी हौ देखी विभिन्न नानाभाँतिका गाली गलौजमा उत्री हाल्ने केही नेपालीहरूले मन अमिलो पारे पनि बिदेशमा रहेका हामी नेपालीहरूलाई भने रात दिन नेपाल र नेपालीकै चिन्ताले सताइरहेको हुन्छ ।

बिहान जुरुक्क उठदा देखी राती नसुत्दा सम्म हामी नेपालकै समाचारहरूमा आँखा डुलाउँछौँ । नेपालमा कहाँ के भयो त्यो हाम्रो चिन्ता र सरोकारको विषय हुन्छ । अहिले हामी आफै कोरोनाको महामारीमा फसेका ठाउँमा छौँ । यहाँ कुन बेला के हुन्छ, मरिन्छ या बाँचिन्छ थाहा छैन । तर हामीलाई हाम्रो होइन नेपालमा भएका आफन्तजन, मित्रहरू, दाजु भाइ दिदी बहिनीहरूको चिन्ता छ । हामीलाई केही भए पनि नेपालमा केही नहोस् भनेर कामना गरिरहेका हुन्छौँ तर हाम्रो मानवीय समवेदना माथि खेलबाड भई नै रहन्छ ।

आज देखी नेपाल लकडाउनको स्थितिमा पुगेछ । यस अघि गत केही दिन देखी काठमाडौँ बाट बाहिरी जिल्ला र गाउँ फर्क अभियान नै चलेछ । चाइनाको बुवान र अन्य ठाउँ बाट हवाई बाटो हुँदै ३० हजार भन्दा बढी चाइनिजहरू नेपाल आएछन् । नेपालमा सञ्चालित विभिन्न परियोजनाहरूमा कार्यरत हजारौंं चाइनिजहरु अस्तिसम्म निर्बाध, बिना चेक जाँच आउने जाने गरे बाटै पनि कोरोना भाइरस नेपालमा आएको छैन भन्ने ठाउँ छैन ।

त्यसै गरी केही दिन यता कोरोना भाइरसको सङ्क्रमण भएका कयौँ देशबाट नेपालीहरू र विदेशीहरू नेपाल आउने जाने क्रम रोकिएको थिएन । छिमेकी देश भारतबाट विभिन्न नाकाबाट आउने जाने को सङ्ख्या कति कति ! नेपालगन्ज, वीरगन्ज, विराटनगर, भैरहवा सुनौली, धनगढी लगायतका दर्जनौँ नाकाहरूबाट नेपाल भित्रिनेको सङ्ख्या कोरोना भाइरस सर्ने, सङ्क्रमण हुने हिसाबले खतराको सूचक मान्नुपर्दछ । हुँदा हुँदा क्वारेन्टाइनमा राखेका मान्छेहरू पर्खाल नाघेर भाग्दै गरेको देख्दा लाग्यो नेपालमा अब कोरोनाको भाइरस सहर देखी गाउँ सम्म फैलने सम्भावना बढ्यो ।

नेपालमा स्वास्थ्यमन्त्रीले नै पत्रकार सम्मेलन गरेर कोरोना भाईरस सँक्रमित भेटिएको बताइसकेकोले खतराको घण्टी बजिसकेको छ । जुन देशमा कोरोनाको टेस्ट गर्ने प्रयोगशाला टेकु काठमाडौँ मा मात्र छ, जहाँ सरकार कमजोर छ र टेस्ट किट देखी चिकित्सक, नर्सका लागि मास्क, गाउन, पन्जा देखी आवश्यक उपकरणहरूको हाहाकार छ अब त्यहाँ को स्थिति कति भयावह होला ? यो सम्झेर अत्यन्त चिन्ता लागेको छ ।

विदेशमा बस्ने हामी नेपालीहरू यता आफ्नो चिन्ता त छँदै छ तर आफ्नो भन्दा बढी चिन्ता नेपालको छ । तसर्थ विदेशबाटै भए पनि अनुरोध गर्न मन लाग्यो – आफू पनि बाँचौँ र अरूलाई पनि बँचाऊँ । सरकारी सूचना, निर्देशनको पालना गरौँ । चिकित्सक र सम्बन्धित निकायका सुझाव ग्रहण गरौँ । आफूमा पनि सके सम्म कोरोना भाइरस सङ्क्रमण हुन नदिऔँ, अरूलाई पनि नसारौँ । बाँचियो भने बाँकी कुरा गर्दै गरौँला अहिले बाँच्ने र बँचाउने कुरा गरौँ । श्री पशुपतिनाथले हामी सबैको कल्याण गरुन् । सबैको जय होस ।

– भर्जिनिया अमेरिका, मार्च २३, २०२० बिहान ११ बजे ।

Related News and Links: click on the below links:-

कोरोना भाईरसको आतंक छ, घर मै बन्धक भएका बेला गीत संगीत सुन्नुस, हेर्नुस । गीत संगीत पनि आफैमा एक प्रकारको मलम हो भन्छन !

गीतहरु शुरु गर्नुभन्दा पहिला म र मेरी श्रीमती दुबै तपाईं हामी सबैको सुस्वास्थ्यका लागि, कोरोना भाईरस आतंकको अन्त्यका लागि भगवान सँग प्रार्थना गर्दछौं  

 

                             

प्रतिक्रिया