नेपाल ८ विकेटले पराजित, सेमीफाइनलको सम्भावना लगभग समाप्त

काठमाडौं,  मङ्सीर २ गते । नेपाल बङ्गलादेशबाट आठ विकेटको भारी अन्तरले पराजित भएको छ । बङ्गलादेश विरुद्धको खेलमा निराशाजनक प्रदर्शनपछि नेपालको एसीसी इमर्जिङ्ग टिम एसिया कपको सेमीफाइनलमा पुग्ने सम्भावना करीब करीब सकिएको छ । हारसँगै नेपाल प्रतियोगिताबाट लगभग बाहिरी सकेको छ । बङ्गलादेश भने तीन खेलमध्ये तीनैमा जित हात पारेर छ अङ्कसहित सेमीफाइनल पुग्ने पहिलो टोली बनेको छ ।
यद्दपी नेपालले सेमीफाइनलमा स्थान सुनिश्चित गर्न समूह बी कै जारी भारत र हङकङबीचको स्पर्धामाथि निर्भर हुनुपर्छ । हङकङले भारतलाई हराएको खण्डमा मात्रै नेपालको रनरेट भारतभन्दा बढी भए सेमीफाइनलमा स्थान बनाउनेछ । तर भारतले हङकङ समक्ष ३ सय २३ रनको उच्च लक्ष्य प्रस्तुत गरेको छ । जसले गर्दा हङकङको भारतमाथि जित सहज छैन् ।
इमर्जिङ्ग कपको तेस्रो खेलमा नेपालले प्रस्तुत गरेको १ सय ३९ रनको लक्ष्य बङ्गलादेशले सहजै भेटायो । उसले मात्र दुई विकेटको क्षतिमा २४ ओभरमा १ सय ४० रन बनाएर जित हात पार्यो । बङ्गलादेशको जितमा कप्तान नजमुल शान्टोले उत्कृष्ट अद्र्धशतकीय पारी खेल्नुभयो । उहाँले ५६ बलको सामना गर्दै ५९ रनमा अविजित रहनुभयो ।
ओपनर सौम्य सरकार मात्र ११ रनको योगदान गरेर पेभेलियन फर्किदा नेपालले दबाब सृजना गर्ने अवसर पाएपनि बङ्गलादेशको अनुभव प्राप्त ब्याटिङ्ग क्रम समक्ष नेपाली बलर नीरिह साबित भए । सुशन भारीले अर्का ओपनर नइम शेषलाई ४५ रनमा दिपेन्द्र सिंह ऐरीको हातमा क्याच आउट गराउँदा नेपालले खेलमा वापसी गर्न अत्यन्तै ढिला गरिसकेको थियो । यासिर अलि चौधरी १८ रनमा अविजित रहनुभयो ।
यसअघि बङ्गलादेशको बलिङ्ग आक्रमण समक्ष ब्याटिङ्ग क्रम धराशायी हुँदा नेपाल १ सय ३८ रनमा समेटिएको छ ।
टस हारेर पहिला ब्याटिङ्ग गर्ने निम्तो पाएको नेपालले ४४.३ ओभरमा मात्र १ सय ३८ रनमा समेटियो । २८ औं ओभरमा ८५ रनमा आठ विकेट गुमाएको नेपालले एक सय रनभित्रै समेटिने अनुमान गरिएको थियो । तर ९ औं विकेटका लागि करण केसी र सोमपाल कामीले अद्र्धशतकीय साझेदारी गर्नुभयो र नेपालको योगफल १ सय ३८ रनसम्म पुर्याउनुभयो । उक्त साझेदारी नै नेपाली इनिंग्सको सबैभन्दा ठूलो साझेदारी रहन गयो । सोमपालले सर्वाधिक ३८ रनको पारी खेल्नुभयो । करण केसी १८ रन बनाएर पेभेलियन फर्किनुभयो ।
कमजोर सुरुवात गर्दै आएको नेपाललाई ज्ञानेन्द्र मल्ल र कुशल भुर्तेलको ओपनर जोडीले ३३ रनको साझेदारी गरेर औसत सुरुवात दिलाउनुभयो । कप्तान मल्ल १० र भुर्तेल २२ रन बनाएर पेभेलियन फर्किदा मध्यक्रम चल्न सकेन । यसअघिको दुबै खेलमा मध्यक्रमले नेपाललाई औसत योगफलसम्म पुर्याउँदै आएको थियो । तर बङ्गलादेशको बलिङ्ग समक्ष मध्यक्रममा शरद भेषवाकार, दिपेन्द्र सिंह ऐरी, मोहम्मद अरिफ शेष, पवन सर्राफ, सुन्दीप जोरा र विनोद भण्डारी टिक्न सेकनन् । भेषवाकार १, ऐरी ६, अरिफ शेष ११, सर्राफ ९, जोरा शुन्य, भण्डारी ८ रनमै पेभेलियन फर्किनुभयो ।
बङ्गलादेशका लागि सुमोन खान र साएद मिनहजुल अबेदिनले सामान तीन तीन तथा मोहम्मद तनवीर इस्लाम र मेहदी हसनले सामान दुई दुई विकेट लिनुभयो ।