अमेरिकाको मेरिल्याण्डमा अमेरिका मै निर्माण गरिएको कुमारी सहितको रथमा राखेर सफलतापूर्वक बर्ष २०१९ को येन्या पुन्ही (इन्द्र जात्रा) मनाइएको छ । यो बर्ष समेत गरेर दोश्रो पटक नेवाः अर्गनाईजेसन अफ अमेरिका ( एनओए )ले कुमारी सहितको रथ तानेर नेपाली समुदायलाई नेपाल कै झझल्को गराई दिएको छ । नेपाली समुदाय इन्द्र जात्रा मनाउन र रथ तान्न अमेरिकाका विभिन्न राज्यहरुबाट पनि आएका थिए ।

डिसी महानगर क्षेत्रमा १८ बर्ष अगाडी नेवा समुदाय द्वारा भाषा ,संस्कृति तथा कलालाई जगेर्ना तथा प्रबर्धन गर्ने उद्धेश्यले स्थापना भएको नेवाः अर्गनाईजेसन अफ अमेरिका ( एनओए )ले नवौ इन्द्र जात्रा)केही नयाँ प्रस्तुति गर्दै भव्यताको साथ सम्पन्न गर्न सफल भएको छ ।

कार्यक्रममा अतिथिको रुपमा पूर्व भौतिक योजना मन्त्रि र हालका प्रतिनिधि सभा सदस्य तथा समाजवादी पार्टीका सह अध्यक्ष राजेन्द्र प्रसाद श्रेष्ठ रहेका थिए । श्रेष्ठले नेवा समुदायले बिदेशमा पनि भाषा ,संस्कृति र कला को जगेर्ना गर्न नेवा समुदायको ठूलो भूमिका रहेको बताए । र संस्थाले गरेको कामको प्रशंसा गर्दै धन्यबाद दिएका थिए ।

यसै गरि मेरिल्याण्ड मन्टगोमेरी काउन्टीका नगर परिषद प्रतिनिधिले एनओएले नेपाली समुदायमा खेलेको भूमिका को सराहना गर्दै काउन्टीको तर्फ बाट सम्मान पत्र हस्तान्तरण गरेका थिए । उक्त सम्मान पत्र कार्यवाहक अध्यक्ष यज्ञमान शाक्यले लिएका थिए । साथै शाक्यले सबैलाई स्वागत गर्दै प्रस्तुत गरिएको नाटक तथा अन्य प्रस्तुतिमा सहभागी रहेका थिए ।

यस पटक पनि कुमारीलाई प्रस्तुत गर्दै नरसिंह अवतारले हिरण्यकशिपु बध गरिएको नाटक प्रस्तुत गरिएको थियो । हिन्दू धर्मका अनुसार नृसिँह “नरसिँह” अवतार भगवान विष्णु चौथो अवतार हो। दैत्यराज हिरण्यकशेपुको बध गर्नको निमित्त र भक्त प्रह्लादको उदार गर्नका निमित्त विष्णु भगवानले नरसिँहावतार धारण गर्नु परेको थियो।

हिन्दु धर्म ग्रन्थका अनुसार कश्यप ऋषिको पत्नी दितीको गर्भबाट दुईटा बालक हिरण्याक्ष र हिरण्यकशेपु पैदा भएका थिए यिनिहरू ठुले भए पछि जता ततै उप्रदव मचाउन थाले। हिरण्याक्षलाई बराह भगवानले मारेका थिए । इन्द्र जात्रामा दुर्गा लाल श्रेष्ठको पुस्तक कुमारीले बिमोचन गरेकी थिइन् ।

उक्त कार्यक्रममा नेवा समुदायको परम्परागत भोज समय बजी सम्पूर्ण सहभागी अतिथिहरुलाई निशुल्क खुवाईएको थियो । उक्त कार्यक्रममा लाखे नाच तथा पुलु किसी (सेतो हात्ती )को नृत्यको साथै परम्परागत स्थानीय रुपमा सजिएकी कुमारी पनि प्रस्तुत गरिएको थियो l यस पटक  आर्थिक सहयोग गर्ने आयोजक तथा दानबिरको नाम रथमा ताम्रपत्रमा कुदी नाम टासिएको थियो ।