बुधबार, माघ १२ २०७८
काठमाडौं ०५:३७
वासिङटन डिसी 18:52

शहीद परिवारको भन्छन् -वास्तविक शहीदको अपमान भयो

इनेप्लिज २०७५ माघ १६ गते १३:०५ मा प्रकाशित

परासी, १६ माघ ।  देशका लागि बलिदान दिने वास्तविक शहीदको पहिचान गर्न शहीद परिवारले माग गरेका छन् ।

जथाभावी शहीद घोषणा गर्ने परिपार्टीले वास्तविक शहीदको अपमान भएको उनीहरुको गुनासो छ । शहीद दिवसका अवसरमा पश्चिम नवलपरासी सुनवल–५ वनकट्टीस्थित जनआन्दोलन २०६२/०६३ का शहीद विष्णु पाण्डेको शालिकमा आज बिहान माल्यापर्ण गर्दै शहीद पाण्डेकी धर्मपत्नी भागिरथी पाण्डेले शहीदको अपमान नगर्न सरकारलाई आग्रह गर्नुभयो ।

राणाशासन र राजतन्त्रको अन्त्य गर्न वीर शहीदले दिएको बलिदानीका कारण आज मुलुकले सङ्घीय लोकतान्त्रिक गणतन्त्र प्राप्त गरे पनि शहीदको रगतको पनि सम्मान हुन नसकेको उहाँको गुनासो छ ।

उहाँ भन्नुहुन्छ, “पछिल्ला केही वर्षदेखि दुर्घटनामा ज्यान गुमाउने, चोरीडकैती गर्दा ज्यान गुमाएकालाई पनि शहीद घोषणा गरिएको छ, दलहरुले आफ्नो कार्यकर्तालाई भागबण्डा लगाएर दलीय हिसाबले शहीद घोषणा गरिरहेका छन्, यसको म घोर भत्र्सना गर्दछु ।”

देश र जनताका लागि आफ्नो जीउज्यानको पनि माया नगरी हाँसीहाँसी शहादत प्राप्त गर्ने व्यक्तिलाई मात्र शहीद घोषणा गर्ने प्रावधान राख्न उहाँको सुझाव थियो । शहीदको बलिदानीका कारण प्राप्त गणतन्त्रात्मक शासनमा शहीदलाई सम्मान गर्नुका सट्टा आजको दिनमा दिइँदै आएको सार्वजनिक बिदा पनि कटौती गरिएकोमा शहीद पाण्डेका दाजु लक्ष्मी पाण्डेले आपत्ति जनाउनुभयो ।

“नेताहरु देशको ढुकुटी रित्ताउने गरी सत्ता लिप्सामा केन्द्रित हुने तर शहीदका परिवारको दैनिकीको अवस्थाप्रति कति पनि जिम्मेवार नहुने प्रवृत्तिले हामीलाई दुःखी बनाएको छ । वर्तमान सरकारले यस्ता विकृति हटाउने छ भन्ने हामी शहीद परिवारले आशा लिएका छौँ”, उहाँले भन्नुभयो ।

शहीद विष्णु पाण्डे स्मृत्ति प्रतिष्ठानले सो कार्यक्रमको आयोजना गरिएको थियो ।

प्रतिक्रिया