मंगलबार, साउन २४ २०७९
काठमाडौं २२:५३
वासिङटन डिसी 13:08

६३ पत्रकार मारिए

अमेरिका पहिलोपटक खतराको सुचीमा

यादवराज जोशी २०७५ पुष ८ गते १२:२३ मा प्रकाशित

सन् २०१८ मा कम्तिमा ६३ व्यवसायिक पत्रकारको हत्या भएको रिपोटर्स विथआउट बोडर्सले यसैसाता प्रकाशित गरेको वार्षिक प्रतिवेदनमा उल्लेख छ । यो संख्या गतवर्षको भन्दा १५ प्रतिसतले बढी हो । पत्रकारको लागि खतरा राष्ट्रको सुचीमा पहिलोपटक अमेरिका पनि समावेस भएको छ ।

रिपोटर्स विथआउट बोडर्सका अनुसार, सुचना र समाचार सम्वन्धित विषयमा ८० जनाको हत्या भएकोमा ६३ जना व्यवसायिक पत्रकार, १३ गैर व्यवसायिक पत्रकार र चार अन्य मिडियाकर्मी थिए । ८० जना पत्रकारमा नागरिक पत्रकार पनि समावेस छन् । सन् २०१८ को जनवरी देखि डिसेम्बर १ सम्मको तथ्यांकमा तीनजना व्यवसायिक पत्रकार अहिले हराई रहेका छन् ।

यसैगरी, ६० पत्रकारलाई बन्धक बनाइएको र तीनसय ४८ जनालाई पक्राउ एवं कैद गरिएको छ । ४९ जना पत्रकारलाई निशाना बनाएर हत्या गरिएको छ भने ३१ जनाको समाचार संकलनको कर्ममा मृत्यु भएको हो । यस्तै हत्या भएका पत्रकारमा ७७ जना पुरुष र तीनजना महिला छन् ।

पत्रकारका लागि असुरक्षित राष्ट्रको सुचीमा पहिलोपटक अमेरिका समावेस भएको छ । अमेरिकामा ६ जना पत्रकारको हत्या भएको छ । द्वन्द्वग्रस्त अफगानिस्तान र सिरिया पत्रकारको हत्या हुने राष्ट्रको सुचीमा अग्रस्थानमा छन् । अफगानिस्तानमा १५ र सिरियामा ११ जना पत्रकारको हत्या भएको छ । यस्तै मेक्सिकोमा नौ र यमनमा आठ पत्रकार मारिएका छन् । सन् २०१८ मा भारतमा ६ जना पत्रकार मारिएका छन् ।

मारिएका पत्रकारको आधा संख्या युद्ध नभएका राष्ट्रमा मारिएका छन् । यसले पत्रकारको सुरक्षा र संरक्षणमा सरकारहरु उदाशीन हुदै गएको देखिएको रिपोटर्स विथआउट बोडर्सले जनाएको छ । बन्दीमा रहेका तीनसय ४८ पत्रकारमा एकसय ७९ व्यवसायिक पत्रकार, एकसय ५० गैर व्यवसायिक पत्रकार र १९ जना अन्य मिडियाकर्मी छन् । गत वर्षको तुलनामा पत्रकारलाई बन्दी बनाउने क्रम सात प्रतिसतले बढेको छ ।

पत्रकारलाई बन्दी बनाउने राष्ट्रमा चीन पहिलो छ । चीनले ६० पत्रकारलाई बन्दी बनाएको छ । यसैगरी दोस्रोमा इजिप्ट (३८) र तेस्रोमा टर्की (३३) छन् । इरान र साउदी अरेबिया दुबैले २८/२८ जना पत्रकारलाई बन्दी बनाएका छन् ।

पत्रकारलाई सरकार र विभिन्न समुहले बन्धक पनि बनाएका छन् । सिरियामा ३१ पत्रकार बन्धक बनाइएका छन् भने यमनमा १७ पत्रकार बन्धक बनेका छन् । यसैगरी इराकमा ११ र एक पत्रकारलाई सन् २०१८ मा बन्धक बनाइएको छ ।

विगत दश वर्षमा सात सय दुई व्यवसायिक पत्रकारको हत्या भएको छ ।

प्रतिक्रिया