छठमा अर्बभन्दा बढीको बेपार भएको छ । रौतहटमा करिब ५४ हजार घरपरिवारले यसपालि छठ मनाइरहेको प्रारम्भिक अनुमान गरिएको रौतहट उद्योग वाणिज्य संघका अध्यक्ष पण्डितप्रसाद जयसवालले बताएका छन् । जिल्लामा दुई गाउँपालिका र १६ नगरपालिकाका गरी १८ स्थानीय तहमा करिब सात लाख बासिन्दा रहेका छन् । करिब १७ प्रतिशत मुस्लिम समुदाय रहको रौतहटमा हिन्दू समुदायको संख्या अत्यधिक छ । हिन्दू, केही क्रिस्चियन र बुद्ध धर्मावलम्बी र फाट्टफुट्ट मुस्लिम समुदायले पनि छठ मान्ने भएकोले छठ मान्नेको संख्या अत्यधिक भएको नागरिक समाज रौतहटका सचिव विजय किशोर झाको दाबी छ ।
करिब ५४ हजार घरपरिवारमा कम्तीमा दश हजार रुपैयाको दरले छठको लागि खर्च भएकोमा सरदर ५४ करोडको साधारण व्यापार भएको मान्न सकिने अध्यक्ष जयसवालको दाबी छ ।

छठ पर्वकै लागि कपडाको ठूलो बेपार हुने गरेको छ । व्रतालुहरुलाई विभिन्न स्थानीय निकायले करोडभन्दा बढीको साडी वितरण गरेको छ । यसै गरी घाटको निर्माणको लागि पनि स्थानीय तहले लाखौँ खर्च गरेको छ । स्थानीय पूजा समितिहरुले गरेको खर्च दशौँ करोड हुने अनुमान छ । रौतहटको गरुडा बजारको लागि बनाइएको दुईवटा छठीघाटको निर्माणमा कम्तीमा छ लाख रुपैया खर्च लागेको देखिएको छ । गरुडा नगरपालिकामा मात्र ३४ ठाउँमा छठ हुने गरेको छ ।
छठको लागि डोम र बिन जातिले बुन्ने बाँसको डाला, कुम्हाले समुदायले बनाउने माटोको हाँडी, घैला तथा ढकना र कोसियाको सामग्रीसमेतको मूल्य जोड्ने हो भने करोडौको खर्च पुग्ने रौतहट उवा संघ अध्यक्ष जयसवालको भनाइ छ ।

यसै गरी मिठाइ पसल तथा किराना पसलमा करोडौँको बिक्री भएको देखिएको छ । छठपर्वको प्रसादको रुपमा विशेष प्रकारको टोपिया मिठाइ, चिनीमात्रको लड्डु र बतासा बनाउने चलन पनि छ । स्याउ, सुन्तला तथा नरिवल र सयपत्री फूलको मालामा पनि करोडौ रुपैया बाहिरिएको अध्यक्ष जयसवालले बताएका छन् ।
चार दिनदेखि जिल्लाभरको किराना र कपडा पसलमा ठूलो भीडभाड रहेको देखिएको छ । उपभोक्ताहरुको ठूलो समूह भारतको बैरगनिया, घोडासहन र अन्य सीमावर्ती बजारहरुमा पनि खरिददारीको लागि जाने गरेको देखिएको छ ।

छठ पर्वमा सबैले दिल खोलेर खर्च गर्ने भएकोले कतिको व्यापार भयो भन्ने तोकेरै भन्न गाह्रो हुने जयसवाल बताउँछन् ।