मंगलबार, कार्तिक ४ २०७७
काठमाडौं २३:१५
वासिङटन डिसी 13:30

शिक्षामा महिलालाई सवल गराएमात्र समाजको समृद्धि हुने : मन्त्री थापा

इनेप्लिज २०७४ फागुन १४ गते १२:०९ मा प्रकाशित

काठमाडौँ, १४ फागुन: महिला बालबालिका तथा समाज कल्याण मन्त्री थममाया थापामगरले महिलालाई शिक्षामा सबल गराएमात्र समाजले समृद्धि हासिल गर्ने बताउनुभएको छ ।
आज यहाँ डिल्लीबजार कन्या क्याम्पसको ३८औँ वार्षिकोत्सका अवसरमा उहाँले भन्नुभयो, “जबसम्म महिला शिक्षामा सबल हुँदैनन्, तबसम्म सिङ्गो समाज पनि सबल हुँदैन । शिक्षामार्फत महिलालाई सवल गराई समाजको समृद्धि गर्नुपर्छ ।”

समाज परिवर्तन गर्न महिलाको भूमिका महत्वपूर्ण हुने भन्दै उहाँले महिलालाई शिक्षा प्रदान गर्न कुनै कमी नराखिने बताउनुभयो ।

मन्त्री थापाले मुलुकको विकासका लागि राज्यका सम्पूर्ण तहमा महिलाको प्रतिनिधित्व हुनुपर्ने बताउनुभयो ।

उहाँले धेरै संघर्ष गरेर महिलाले आर्थिक सामाजिक अधिकार पाए पनि कार्यान्वयनको अवस्था भने नभएको उल्लेख गर्नुभयो ।

मन्त्री थापाले विगतमा राजनीतिक अस्थिरताले शिक्षामा विकृति देखिएकाले अबको बहुमतको सरकारले शिक्षाका ठोस नीति ल्याई अघि बढ्नेसमेत बताउनुभयो ।

कार्यक्रममा क्याम्पस सञ्चालन समितिका सदस्य सावित्री भुसालले महिला शिक्षालाई जोड दिएर समग्र महिलालाई समाज परिवर्तनमा लगाउनुपर्ने बताउनुभयो ।

कार्यक्रममा प्रजातान्त्रिक प्राध्यापक संघ नेपालका सभापति जगत तिमिल्सेनाले क्याम्पस तहका शिक्षालाई व्यावहारिक बनाउनुपर्नेमा जोड दिनुभयो ।

कार्यक्रममा उक्त क्याम्पसका पूर्व क्याम्पस प्रमुख भोलानाथ रेग्मीले राज्यका सामुदायिक क्याम्पसप्रति एउटै नीति बनाउनुपर्ने बताउनुभयो ।

कार्यक्रममा काठमाडौँ महानगरपालिका–२९ का वडाध्यक्ष कुश ढकाल, पद्मकन्या विद्यालयका प्रधानाध्यापक रीता तिवारीले शिक्षालाई सरकारले आफ्नो दायित्व सम्झेर काम गर्नुपर्ने बताउनुभयो ।

कार्यक्रममा उक्त क्याम्पसका क्याम्पस प्रमुख अपराजिता अर्यालले महिला शिक्षाका क्षेत्रमा मुलुककै ठूलो क्याम्पस रहेकाले क्याम्पसको जग्गा नभएकाले थप भौतिक पूर्वाधार गर्नका लागि समस्या भएको बताउनुभयो ।

शिक्षामा महिलाको पहुँच पु¥याउने उद्देश्यले २०३७ सालमा उक्त क्याम्पस स्थापना गरिएको थियो । अहिले स्नातकतर्फ मानविकी, व्यवस्थापन, शिक्षा संकाय र स्नातकोत्तरतर्फ मानविकी संकायमा अँग्रेजी र समाजशास्त्र तथा व्यवस्थापन संकायमा एमबिबिएस विषयमा करिब एक हजार विद्यार्थीले अध्ययन गरिरहेका छन् ।

कार्यक्रममा दीर्घसेवाबाट माधव घिमिरे र ममता सिन्हा तथा उत्कृष्ट प्राध्यापकबाट रेशराज अधिकारी र कर्मचारीबाट सुमन कार्कीलाई पुरस्कृत गरिएको थियो ।

यसैगरी विभिन्न संकायमा उत्कृष्ट अंक ल्याउने विद्यार्थीलाई पनि पुरस्कार प्रदान गरिएको थियो ।

सोही कार्यक्रममा यसै वर्षदेखि समाजसेवी नरनाथ दाहालले आफ्ना आमाबुबाको नाममा रु एक–एक लाखको ‘बलभद्र दाहाल र चन्द्रकला दाहाल असहाय तथा जेहेन्दार छात्रवृत्ति’ कोष तथा भाइ दयाकृष्ण दाहालको नाममा ‘दयाकृष्ण दाहाल छात्रवृत्ति’ समेत स्थापना गरेको घोषणा गर्नुभएको छ ।

प्रतिक्रिया