सोमबार, असोज ११ २०७८
काठमाडौं ०४:१८
वासिङटन डिसी 18:33

आफूहरु देश टुक्रयाउन खोजेको होइनः संयोजक ठाकुर

इनेप्लिज २०७४ मंसिर १४ गते १३:१९ मा प्रकाशित

गौशाला, १४ मंसिर  ः राष्ट्रिय जनता पार्टी नेपालका संयोजक महन्थ ठाकुरले आफूहरु देश टुक्रयाउन नखोजेको बताउनुभएको छ ।

महोत्तरी क्षेत्र नं ३ बाट प्रतिनिधिसभा सदस्यका उम्मेदवारसमेत रहनुभएका संयोजक ठाकुरले आज जलेश्वरमा आयोजित चुनावीसभामा भन्नुभयो –“आफूहरु देश टुक्रयाउन नखोजेर काठमाडौँलाई मधेशसँग सिधा जोड्न खोजेको हो ।”

काठमाडौँले मधेश र मधेशीलाई हेर्ने दृष्टिकोणमा परिवर्तन ल्याउनुपर्छ भने मात्र चाहेको हो, उहाँले भन्नुभयो –“त्यसका लागि काठमाडौँ र मधेशमा बस्ने सबै नेपालीका बीच प्रगाढ सम्बन्ध स्थापित गर्न राज्यलाई जिम्मेवार बनाउन खोजेको हो । ”

संयोजक ठाकुरले मधेश बिना पहाडको र पहाड बिना मधेशको परिकल्पना गर्नु कसैका लागि हितकर नहुने बताउँदै आफूहरु त्यही कुरा काठमाडौँमा बसेर मधेशी जनताको नाउँमा झूठो राजनीति गर्नेहरुलाई बुझाउन खोजेको धारणा व्यक्त गर्नुभयो ।

नेपाल सबै नेपालीको साझा घर हो र यहाँ बस्ने एक÷एक व्यक्ति बराबरका हिस्सेदार रहेकाले यसलाई टुक्रयाउनुमा कसैको भलो नहुने भएकाले यसलाई अखण्ड राख्नु सबैको साझा दायित्व रहेको छ उहाँले भन्नुभयो ।

संयोजक ठाकुरले नेपालका हिमाल, पहाड र तराई मधेशमा बस्ने सबैले बराबरको हक, अधिकार, मान, सम्मान र पहिचान पाउनुपर्छ भन्दै राज्यले त्यो नदिएसम्म देशमा विभिन्न आन्दोलन चलिरहने स्पष्ट पार्नुभयो ।

मधेश र मधेशभित्र बसोबास गर्ने प्रत्येक जाति, वर्ग र समुदायको हक, अधिकार, मान, सम्मान, पहिचान र चौतर्फी विकासका लागि यस पटकको निर्वाचनमा राजपा नेपाललाई मतदान गर्न मतदाताहरुलाई उहाँले आग्रह गर्नुभयो ।

प्रतिक्रिया