आइतबार, मंसिर १४ २०७७
काठमाडौं १५:३०
वासिङटन डिसी 04:45

संविधान कार्यान्वयन गर्न मिलेर अगाडि बढ्नुपर्छ : परराष्ट्रमन्त्री

इनेप्लिज २०७३ कार्तिक ९ गते १२:३० मा प्रकाशित

Prakash-Saran-mahatकाठमाडौँ, ९ कात्तिक । परराष्ट्रमन्त्री डा प्रकाशशरण महतले विशिष्ट राजनीतिक अवस्थामा संविधान कार्यान्वयनका लागि सबै राजनीतिक दल मिलेर अगाडि बढ्नुपर्ने बताउनुभएको छ ।

नुवाकोट–काठमाडौँ पत्रकार समाजले आज यहाँ आयोजना गरेको चियापान तथा भेटघाट कार्यक्रमलाई सम्बोधन गर्दै उहाँले मुख्य तीन राजनीतिक दलको सहमतिका आधारमा निर्वाचनका प्रक्रिया अगाडि बढाउनुपर्ने धारणा राख्नु भयो ।

मन्त्री महतले भन्नुभयो – “लोकतन्त्रमा सबैले विधिको शासनलाई आत्मसात् गर्दै अगाडि बढ्नुपर्छ, त्यसका लागि सबै राजनीतिक दलले राजनीतिक सद्भाव र सहयोग गर्नुपर्छ ।

द्विपक्षीय, क्षेत्रीय एवम् अन्तर्राष्ट्रिय मञ्चमा नेपालको स्वार्थ र आवश्यकता सम्बोधन गर्न आफू लागिपरेको बताउँदै उहाँले मुलुकको हितमा विदेशी सहयोग तथा लगानी कसरी गर्न सकिन्छ भन्ने विषयमा दिनरात खटिरहेको छु भन्नुभयो ।

नेपाली काँग्रेसका नेतासमेत रहनुभएका डा महतले अख्तियार दुरुपयोग अनुसन्धान आयोगका निलम्बित प्रमुख आयुक्त लोकमानसिंह कार्कीका विषयमा निर्णय गर्ने दिन आइनसकेकाले त्यो दिन पर्खन आग्रह गर्नुभयो ।

नुवाकोट मुलुकको राजधानी नजिक भएर पनि विकास नभएको भन्दै उहाँले शिक्षा, स्वास्थ्य एवम् विकासका विषयमा अग्रसरता लिनुपर्नेमा जोड दिनुभयोे ।

कार्यक्रममा कृषि राज्यमन्त्री राधिका तामाङले नुवाकोटको विकासका लागि सबै क्षेत्रको सहयोग आवश्यक भएको भन्दै त्यसका लागि मिलेर अगाडि बढ्नुपर्ने बताउनुभयो ।

पत्रकार समाजका अध्यक्ष दिनेश आचार्यले विकासका मुद्दामा सबै पक्ष एकमत भएमात्र नुवाकोटसहित समग्र मुलुक परिवर्तन गर्न सकिने भन्दै त्यसतर्फ लाग्न आग्रह गर्नुभयो । कार्यक्रममा पछिल्लो पटक निजामती सेवा अधिकृतमा प्रवेश गर्ने नौजनालाई सम्मान गरिएको थियो ।

त्यसैगरी कार्यक्रममा नुवाकोटमा प्रतिनिधित्व गर्ने विभिन्न राजनीतिक दलका नेता, राष्ट्रसेवक कर्मचारी, कलाकार, उद्योगी व्यवसायी, खेलाडी, पत्रकार एवम् विशिष्ठ व्यक्तिहरुको उपस्थिती थियो ।

प्रतिक्रिया