मंगलबार, कार्तिक ९ २०७८
काठमाडौं ०२:५६
वासिङटन डिसी 17:11

‘नयाँ प्रधानमन्त्री प्रचण्ड वा देउवा, अबको प्रमुख प्रतिपक्ष एमाले’

इनेप्लिज २०७३ असार १६ गते ४:२२ मा प्रकाशित

gopal-kirati-650x467

काठमाडौं, १६ असार । नेकपा (माओवादी केन्द्र) नेता गोपाल किरातीले एमालेका नेताहरू अध्यक्ष प्रचण्डलाई हेगमा उभ्याउने खेलामा लागेको आरोप लगाउनुभएको छ ।

नेपालवाणी रेडियो नेटवर्कमा आज बिहान पत्रकार ऋषि धमलासँग कुरागर्दै नेता किरातीले भन्नुभयो, ‘एमालेका नेताहरू प्रचण्डलाई हेगमा लगेर उभ्याउने षड्यन्त्रमा लागेका छन् । विभिन्न स्थानमा उजुरी दिन लगाइरहेका छन् ।’ उहाँले सत्तासाझेदार भएर पनि एमालेले त्यस्तो व्यवहार नदेखाएको आरोप लगाउनु भयो ।

वर्तमान सरकारबाट माओवादी केन्द्र हट्नु पर्ने बताउनुभएका नेता किरातीले भन्नुभयो, ‘भारतीय कांग्रेसआइको समर्थनले मात्रै यो सरकार टिकेको छ । कांग्रेसआइसँगको सम्बन्धले गर्दा केपी ओलीको सम्बन्ध भाजपासँग बिग्रिएको हो ।’

‘अब यो सरकार कसैले थामेर थामिदैन’, माओवादी केन्द्रका नेता किरातीले भन्नुभयो, ‘ओलीलाई समातेर बस्ने हो भने हाम्रो पार्टी पनि सक्किन्छ ।’

बजेट अगाडि नै सरकार ढल्ने संकेत आफूले पाएको दाबी गर्नुभएका नेता किरातीले अगाडि भन्नुभयो, ‘यो सरकार ढल्छ । हाम्रा मन्त्रीहरूले सरकारको पक्षमा उभिए भने कारबाही हुन्छ । यो सरकारले भाषण गर्नेभन्दा अरु केही गरेको छैन ।’

आउने मंसिरमा कुनै पनि हालतमा चुनाव नहुने किरातको भनाइ छ । ‘तयारी विनै स्थानीय निकायको चुनाव कसरी हुन्छ ?’, उहाँले भन्नुभयो ।

आफ्नो पार्टीका अध्यक्ष प्रचण्ड अबको नयाँ प्रधानमन्त्री भएको बताउनुभएका उहाँले भन्नुभयो, ‘शेरबहादुर देउवा पनि प्रधानमन्त्रीको विकल्प हो ।’ नेता किराती अबको प्रमुख प्रतिपक्ष दल रहेको उल्लेख गर्नुभयो ।

प्रतिक्रिया