हेटौँडा, १४ असार । नेपाली सेनाको अपरेसन पुनःनिर्माण–१ अन्तर्गत नयाँ सबुज गण सुपारीटार ब्यारेकले भीमफेदी गाविसस्थित बिर्ता हात्तीसारमा भूकम्पपीडितका लागि अस्थायी सामूहिक आवासगृह निर्माण गरी जिल्ला दैवी प्रकोप उद्धार समितिलाई हस्तान्तरण गरेको छ ।

मध्यपृतनापति गणेशबहादुर कार्कीले मध्यमाञ्चल क्षेत्रीय प्रशासक मुकुन्दराजप्रसाद तिमल्सिनामार्फत जिल्ला दैवी प्रकोप उद्धार समितिलाई भवन हस्तान्तरण गरेको हो । सेनाले गत २१ गते निर्माण सुरु गरी २५ दिनमा नै निर्माण सम्पन्न गरेको उक्त आवासगृहमा १६ परिवार भूकम्पपीडित विपन्न घरविहीनलाई अस्थायी रुपमा राख्ने भीमफेदी गाविसले जनाएको छ ।

नेपाली सेनाले मकवानपुर जिल्लाको पाँच गाविस निबुवाटार, गोगने, शिखरपुर, सुकौरा र भीमफेदीमा ५६ भूकम्पपीडितलाई अस्थायी सामूहिक आवासगृह निर्माण सम्पन्न गरी हस्तान्तरण गरिसकेको जानकारी दिएको छ । सो आवासगृहमा खानेपानी, शौचालय, विद्युत् सेवासमेत उपलब्ध गरिएको छ ।