मंगलबार, कार्तिक ११ २०७७
काठमाडौं ०३:४८
वासिङटन डिसी 18:03

प्रम ओलीद्वारा लगानी गर्न अन्तर्राष्ट्रिय समुदायलाई आग्रह

इनेप्लिज २०७३ जेठ २६ गते १५:०१ मा प्रकाशित

KP_Oli

काठमाडौँ, २६ जेठ । प्रधानमन्त्री केपी शर्मा ओलीले नेपालको संविधान जारी भएसँगै लगानीको उपयुक्त वातावरण बनेकाले अन्तर्राष्ट्रिय समुदायलाई लगानीका लागि आह्वान गर्नुभएको छ ।

आफ्नो कार्यकक्ष सिंहदरबारमा आज भएको विदेशस्थित दातृ निकायका प्रतिनिधिसँगको भेटका क्रममा प्रधानमन्त्री ओलीले संविधान जारीपश्चात मुलुकमा लगानीमैत्री वातावरण बनेकाले लगानीका लागि आह्वान गर्नुभएको हो ।

प्रधानमन्त्री ओलीसँग बेलायती विदेश मन्त्रालयका सचिव सर साइमन म्याकडोनाल्ड र बेलायती अन्तर्राष्ट्रिय विकास सहयोग नियोग (डिएफआइडी) का सचिव मार्क लोकक तथा संयुक्त राष्ट्रसङ्घीय शरणार्थीसम्बन्धी उच्चआयुक्तको कार्यालय (युएनएचसिआर) का प्रतिनिधिले छुट्टाछुट्टै भेटवार्ता गर्नुभएको थियो ।

दुबै भेटमा नेपालको आर्थिक विकास र दुई पक्षीय सम्बन्धबारे सौहार्दपूर्ण कुराकानी भएको छ । भेटमा खासगरी नेपालको आर्थिक विकासमा कसरी बेलायतको लगानी भित्र्याउन सकिन्छ भन्नेबारे कुराकानी भएको थियो ।

दुई देशबीच कूटनीतिक सम्बन्ध स्थापना भएको २०० वर्ष पुगेको सन्दर्भमा आपसी सम्बन्धलाई थप सुदृढ र बलियो बनाउनेबारे पनि उहाँहरुबीच कुराकानी भएको थियो ।

बेलायतले नेपालको संविधान कार्यान्वयनबारे पनि चासो राखेको थियो ।

त्यस्तै युएनएचआरसीका प्रतिनिधिले पनि नेपालको आर्थिक विकास र भूटानी शरणार्थी समस्याबारे जिज्ञासा राखेको थिए ।

बेलायती सचिवसँगको भेटमा प्रधानमन्त्री ओलीले नेपालमा प्रसस्त लगानीको वातावरण रहेकाले ढुक्कका साथ लगानी गर्न आग्रह गर्नुभएको प्रधानमन्त्रीका परराष्ट मामिला सल्लाहकार गोपाल खनालले सञ्चारकर्मीलाई जानकारी दिनुभयो ।

दुई देशबीचको सम्बन्ध, नेपालको आर्थिक विकासमा बेलायतको भूमिकालगायतको विषयमा कुराकानी भएको उहाँले उल्लेख गर्नुभयो ।

बेलायती सचिवहरुले संविधान जारीपश्चात नेपाल आर्थिक विकासको दिशातर्फ उन्मुख भएकामा खुसी व्यक्त गर्दै खासगरी ठूला परियोजनामा वेलायती लगानी कसरी भित्र्याउने र लगानी सुरक्षित गर्नेबारे विस्तृत कुराकानी भएको थियो ।

प्रमका परराष्ट सल्लाहकार खनालका अनुसार बेलायतले संविधान कार्यान्वयनप्रति राखेको चासोको जवाफमा प्रधानमन्त्री ओलीले नेपाल यतिखेर संविधान कार्यान्वयनको चरणमा रहेको र सबैखाले समस्या समाधान भइसकेको र केही भए वार्ता र सहमतिबाटै समाधान खोजिने बताउनुभएको थियो ।

डिएफआइडीका सचिव मार्क लोककले प्रधानमन्त्री ओलीसँगको भेटमा नेपालको आधुनिक विकास र दुईपक्षीय सहयोगबारे सौहार्दपूर्ण कुराकानी भएको बताउनुभयो ।

त्यसैगरी युएनएचसिआरका प्रतिनिधिसँगको भेटमा विशेषगरी भुटानी शरणार्थी समस्या समाधान, नेपालको आर्थिक विकासमा खेल्ने भूमिकालगायतका विषयमा छलफल भएको थियो ।

भेटपछि सञ्चारकर्मीलाई जानकारी दिँदै युएनएचआरसीका प्रतिनिधि क्रेग सेन्डर्सले नेपालको समसामयिक परिस्थिति र भुटानी शरणार्थीबारे कुराकानी भएको बताउनुभयो ।

प्रतिक्रिया