न्यूयोर्क,अमेरिका,अप्रिल १६ | नेपाल अमेरिका पत्रकार संघ-नेजाकी कोषाध्यक्ष बिटु केसीलाई मातृशोक परेको छ | केसीकी ममतामयी माता शान्ता केसीको आज शनिवार बिहान आफ्नै निवास चण्डोल विशालनगर (काठमाडौँ) मा अचानक अप्ठ्यारो महसुस गरेपछि अस्पताल लैजाने क्रममा बाटोमा नै निधन भएको थियो | उहाँ ६६ वर्षको हुनुहुन्थ्यो | ह्युस्टनमा रहनु भएका केसीका ज्वाईं एवं नेजाका सल्लाहकार तारा बरालले आफ्नी सासुको निधन ह्रदयघातका कारण भएको फेसबुकमार्फत उल्लेख गर्नु भएको छ | नेजा कोषाध्यक्ष केसी (बराल) आफ्नी आमालाई अमेरिका ल्याउने प्रक्रियामा हुनुहुन्थ्यो | ग्रीनकार्ड समेत प्राप्त भैसकेपछि यही अप्रिल २६ मा नेपालमा उहाँको अन्तर्वार्ता समेत निश्चित भैसकेको थियो | तर अचानक निधन भएपछि त्यो सबै योजना अधुरो हुन पुगेको छ | यसैबीच नेजाका अध्यक्ष गौतम दाहालले आजै एक समवेदना सन्देश प्रकाशित गरी कोषाध्यक्ष बिटु केसीलाई परेको मातृशोकप्रति दु:ख व्यक्त गरेका छन् | नेजाका तर्फबाट जारी विज्ञप्तिमा भनिएको छ,-‘यस नेपाल अमेरिका पत्रकार संघ-नेजाकी कोषाध्यक्ष बिटू केसी (बराल) की ममतामयी माता एवं संस्थाका सल्लाहकार तारा बरालकी सासु शान्ता केसीको शनिवार बिहान निधन भएको खबरले हामी अत्यन्त मर्माहत भएका छौं |’