मंगलबार, मंसिर १४ २०७८
काठमाडौं २१:५४
वासिङटन डिसी 11:09

संविधान कार्यान्वयनका लागि रचनात्मक भूमिका खेल्नुस्: प्रधानमन्त्री

इनेप्लिज २०७२ चैत १७ गते १५:४७ मा प्रकाशित

Kp-Oli_1-1काठमाडौँ, १७ चैत । प्रधानमन्त्री केपी शर्मा ओलीले संविधानको सफल कार्यान्वयनका लागि रचनात्मक भूमिका खेलिदिन सञ्चार माध्यमसँग आग्रह गर्नुभएको छ ।

रिपोर्टर्स क्लब नेपालको १८औँ वार्षिकोत्सव तथा चौथो अधिवेशनको आज यहाँ उद्घाटन गर्दै उहाँले राजनीतिक सङ्घर्ष टुङ्ग्याएर मुलुक आर्थिक क्रान्तिको दिशामा अघि बढेको सन्दर्भमा सञ्चारमाध्यमसँग सहयोगका लागि आग्रह गर्नुभएको हो ।

प्रधानमन्त्री ओलीले भन्नुभयो– “संविधानले राजनीतिक, सामाजिक, आर्थिक सबै अधिकारलाई समेटेको छ । अब हामी विकासको गतिमा अघि बढ्नुपर्छ । अबको एजेन्डा आर्थिक नै हो । यसमा सञ्चार जगत्ले सकारात्मक भूमिका खेलिदेओस् ।”

प्रेसको स्वतन्त्रता र रक्षाका लागि सरकार प्रतिबद्ध रहेको उल्लेख गर्दै उहाँले देशको राष्ट्रिय आवश्यकताप्रति जिम्मेवार बन्न सबै पक्षलाई आग्रह गर्नुभयो ।

प्रधानमन्त्री ओलीले आफू अप्ठ्यारो अवस्थामा प्रधानमन्त्री भएको भएपनि भारतसँगको सम्बन्ध सुधार्न र चिनियाँ लगानी भित्र्याउन महत्वपूर्ण काम भएको उल्लेख गर्नुभयो ।

एक फरक प्रसङ्गमा प्रधानमन्त्री ओलीले अहिलेको सरकारलाई राष्ट्रियस्वरुप दिनका लागि प्रमुख प्रतिपक्षी दल नेपाली काँग्रेसलाई सरकारमा सहभागी हुन आह्वान गर्नुभयो ।

सभामुख ओनसरी घर्तीले संविधान कार्यान्वयनका लागि सबै एकजुट भएर अघि बढ्नुपर्ने आवश्यकता औँल्याउँदै संविधानमा देखिएका असमझदारीलाई वार्ता र संवादका माध्यमबाट सल्टाउनुपर्ने बताउनुभयो ।

वार्ता र सहमतिबाटै समाधान निस्कन्छ: सभापति देउवा

नेपाली काँग्रेसका सभापति शेरबहादुर देउवाले मुलुकको विद्यमान राजनीतिक समस्या वार्ता, संवाद र सहमतिबाटै समाधान गर्न सकिने बताउनुभयो ।

उहाँले भन्नुभयो – “वार्ताबाटै समस्याको निकास निकाल्न सकिन्छ । प्रदेश सीमाङ्कनलगायतका विषयलाई वार्ताबाटै सहमति गर्न म तयार छु । अब, नेपालमा नवनिर्माणको कामलाई अघि बढाउन सबै मिलेर जानुपर्छ ।”

उपप्रधानमन्त्रीद्वय भीम रावल र चित्रबहादुर केसीले संविधानका विषयमा दलहरुबीच देखिएका असमझदारीलाई वार्ताबाटै समाधान गर्न सकिने बताउनुभयो ।

पूर्वसभामुख सुवासचन्द्र नेम्वाङले संविधान कार्यान्वयनका लागि सबै राजनीतिक दल एक ठाउँमा उभिनुपर्नेमा जोड दिनुभयो ।

सङ्घीय समाजवादी फोरम नेपालका अध्यक्ष उपेन्द्र यादवले मुलुकको समस्या समाधानका लागि प्रमुख राजनीतिक दल गम्भीर हुनुपर्ने बताउनुभयो । कार्यक्रमलाई पूर्वप्रधानमन्त्री झलनाथ खनाल, बाबुराम भट्टराई र लोकेन्द्रबहादुर चन्दले पनि सम्बोधन गर्नुभएको थियो ।

सो अवसरमा क्लबले रु एक लाख राशिको स्व गिरिजाप्रसाद कोइराला स्मृति पत्रकारिता पुरस्कार पत्रकारद्वय नागरिक दैनिकका सम्पादक गुणराज लुइँटेल र देशान्तर साप्ताहिकका सम्पादक कवीर राणालाई प्रदान गरेको थियो ।

उक्त पुरस्कारको रकम लुइँटेलले समता शिक्षा सदन र भट्टराईले क्यान्सर केयर सोसाइटीलाई सहयोग स्वरुप प्रदान गर्नुभयो ।

त्यस्तै नगद रु ५० हजार राशिको तारिणीप्रसाद कोइराला स्मृति पत्रकारिता पुरस्कार अन्नपूर्ण पोष्टका सम्पादक चूडामणि भट्टराई र नेपाल टेलिभिजनका समाचार सम्पादक राजु सिलवाललाई प्रदान गरिएको छ ।

त्यसैगरी, क्लबका तर्फबाट राष्ट्रिय समाचार समिति (रासस)का संवाददाता नारायणप्रसाद न्यौपाने, गोरखापत्र संस्थानका लक्की चौधरी, रेडियो नेपालका खगेन्द्र खत्रीलगायत विभिन्न सञ्चार माध्यममा आबद्ध पत्रकारलाई समेत कार्यक्रममा सम्मान गरिएको थियो ।

प्रतिक्रिया