भारतले आज ६७औं गणतन्त्र दिवस मनाउँदै

काठमाडौं १२ माघ ।
भारतले आज आफ्नो ६७ औं गणतन्त्र दिवस मनाउँदैछ । नयाँ दिल्लीमा विशेष समारोहका बीच गणतन्त्र दिवस मनाउन लागेको हो । सन् १९५० जनवरी २६ का दिन भारतमा नयाँ संविधान लागु भएको स्मरणमा भारतले गणतन्त्र दिवस मनाउँदै आएको छ । अहिले केहीबेरमा औपचारिक कार्यक्रम शुरु गरिने जनाइएको छ । गणतन्त्र दिवस अबरमा प्रधानमन्त्री नरेन्द्र मोदीले विषेश सम्वोधन गर्दै हुनुहुन्छ । भारतमा गणतन्त्र दिवसअबसरमा सुरक्षा व्यवस्था कडा पारिएको छ । राजधानी नयाँ दिल्लीलाई सात तहमा कडा सुरक्षाको व्यवस्थापन गरिएको छ । काठमाण्डुमा पनि भारतीय दुतावासले विषेश कार्यक्रम गर्दैछ ।

भारतका राष्ट्रपति भण्डारीको बधाई

राष्ट्रपति विद्यादेवी भण्डारीले भारतको ६७औँ गणतन्त्र दिवसका अवसरमा त्यहाँका राष्ट्रपति प्रणव मुखर्जीलाई एक बधाई सन्देश पठाउनुभएको छ । सन्देशमा राष्ट्रपति भण्डारीले भारतीय राष्ट्रपतिको व्यक्तिगत सुख र सुस्वास्थ्यका साथै भारतीय जनताको प्रगति र समृद्धिको कामना गर्नुभएको छ । दुई देशबीच विद्यमान मैत्रीपूर्ण सम्बन्ध आगामी वर्ष अझ सुदृढ हुने विश्वास पनि राष्ट्रपति भण्डारीले व्यक्त गर्नुभएको छ
यस्तै राष्ट्रपति भण्डारीले अस्ट्रेलियाको राष्ट्रिय दिवसका अवसरमा त्यहाँका गभर्नर जनरल सर पिटर कोसग्रोभलाई पनि बधाई सन्देश पठाउनुभएको छ । सन्देशमा उहाँले गभर्नर कोसग्रोभको व्यक्तिगत सुख र सुस्वास्थ्यका साथै त्यहाँका जनताको उत्तरोत्तर प्रगतिको कामना गर्नुभएको छ । दुई देशबीच रहिआएको मैत्रीपूर्ण सम्बन्ध आउँदा वर्ष अझ प्रगाढ हुँदै जाने विश्वास पनि उहाँले सन्देशमा व्यक्त गर्नुभएको छ ।