आज काभ्रेपलाञ्चोकस्थित पनौती नगरपालिकाको आव २०७३÷७४ को बजेट तथा कार्यक्रम सार्वजनिकीकरण समारोहमा उहाँले त्यसका लागि राजनीतिक दलहरुको परामर्श र सहमति आवश्यक छ भन्नुभयो ।

उपप्रधानमन्त्री थापाले भन्नुभयो, “स्थानीय निकायको निर्वाचन चाँडै हुन्छ र त्यसका लागि सरकारले आवश्यक तयारी गरिरहेको छ ।” उहाँले मुलुक अब विकास निर्माण र आर्थिक समृद्धितर्फ अघि बढ्नुपर्नेमा जोड दिँदै नयाँ संविधानका कारण अब कसैले पनि बन्दुक बोकेर जङ्गल जानुपर्ने र नाकाबन्दी गर्नुपर्ने अवस्था आउने छैन, भन्नुभयो ।

यो संविधानले फरक विचार राख्नेलाई पनि सम्बोधन गर्ने प्रयास गरेकाले जनताप्रति विश्वास राख्ने जो कसैले पनि हिंसात्मक बाटो अवलम्बन गर्नु नपर्ने उपप्रधानमन्त्री थापाले उल्लेख गर्नुभयो ।

समावेशी दृष्टिकोणको आधारमा अहिलेको संविधान अग्रगामी र प्रगतिशील भएको औँल्याउँदै उहाँले राज्यको विभिन्न अङ्गमा दलित, जानजाति, मुस्लिम, आदिवासी, थारु, पिछडिएको समुदायको प्रतिनिधित्वलाई सुनिश्चित गरेको बताउनुभयो ।

संविधानसभामा जातीय, क्षेत्रीय, लैङ्गिकलगायत समावेशी चरित्र बोकेको संविधानसधाबाट संविधान निर्माण हुनु आफैँमा जटिल भएको जिकिर गर्दै उपप्रधानमन्त्री थापाले नयाँ संविधानले विश्वका प्रचलित प्रजातान्त्रिक मूल्य र मान्यतालाई समेत आत्मसात् गरेको उल्लेख गर्नुभयो ।

“विगतमा पनि राज्यको पुनःसंरचनाका बारेमा राजनीतिक दलबीच मतभेद थियो र अहिले पनि त्यो यथावत् छ यसलाई संवादका माध्यमबाट टुङ्गो लगाउनुपर्छ”–उहाँले भन्नुभयो ।

सो अवसरमा पनौती नगरपालिकाका कार्यकारी अधिकृत श्याम खड्काले आब २०७३÷७४ का लागि रु दश करोड ४८ लाख २३ हजार बराबरको आय तथा व्यय प्रस्तुत गर्नुभएको थियो ।