काठमाडौँदेखि १७ किलोमिटर पूर्वको कागेश्वरी मनोहरा नगरपालिका आलापोटको यो विद्यालयमा हरेक वर्ष केही न केही शैक्षिक र खेल सामग्री लिएर पुग्दा उनलाई निकै आनन्द लाग्छ । यसवर्ष भने उनी कोरियन टिचर्स एण्ड एजुकेसन वर्कस युनियन चुङ नाम प्रान्तका १७ शिक्षक लिएर त्यहाँ पुगे ।

उनीहरुले दुई दिन त्यहीँ बसेर विद्यालयको भवनको रङ्रोगन गरे । कलिला जिज्ञासु विद्यार्थीलाई कला र मनोरञ्जनका सीप सिकाए । नेपाली बालबालिका, समाज र संस्कृतिबारे अध्ययन गरे । खेल र शैक्षिक सामग्री बाँडे । प्रायः सबै नगरकोटी थरका सो विद्यालयमा अहिले ६५ विद्यार्थी छन् ।

“हामीले केही दिन सकेका छैनौँ, बरु सानासाना विद्यार्थीसँग घुलमिल हुँदा धेरै कुरा सिकेका छौँ”–युनियनका टोली नेता जुङले भने । सबै शिक्षक भएकाले यहाँका विद्यार्थीको मनोभावना महसुस गर्न सकेको उनीहरुले बताए ।

कोरियन शिक्षकको टोलीले उक्त विद्यालयको एक तला ट्रसको भवन थपिदियो । शौचालय बनाइदियो । झ्याल, ढोका, खापासहितका पूर्वाधार मर्मत एवम् कम्पयुटरलगायत आवश्यक सामग्री थप ग¥यो ।

“सबै गरेर रु २३ लाख खर्च भएको छ, यो सबै कोरियन शिक्षकको युनियन र सहभागीले व्यहोरेका हुन्”–टोलीलाई आठ वर्षदेखि संयोजन गर्दै आइरहेका के टु समिट टे«क एण्ड एक्सपिडिसन प्रालिका प्रबन्ध निर्देशक सीरप जाङवु शेर्पाले रासससँग भन्नुभयो ।

सोही क्षेत्रका सांसद रामेश्वर फुयाँलले नेपाल र कोरियाको सम्बन्ध जनस्तरमा बढाउन यस्ता कार्य सहयोगी हुने भन्दै बुद्धको जन्मभूमि नेपालमा कोरियाली शिक्षकलाई स्वागत गर्न पाउँदा खुसी लागेको बताउनुभयो ।

“विद्यार्थीले शैक्षिक, खेल सामग्री तथा कला र मनोरञ्जनका सीप सिकेका छन, विद्यालयले आफ्नो स्वरुप फेर्न पाएको छ”–विद्यालयका प्रधानाध्यापक रामभक्त खड्काले कोरियाली शिक्षकको मनकारी सहयोगको प्रशंसा गर्दै भन्नुभयो । नेपालका आठ हजार मि अग्ला सबै हिमाल चढेका शेर्पाले अन्य हिमाल एवम् चुली पनि कैयौँपटक चढिसकेका छन् । उहाँको जुङसँग सन् २००२ मा ल्होत्से आरोहणमा भेट भएको थियो । सन् २००६ मा उहाँहरुले सँगै सगरमाथा चढ्नुभयो ।

कोरियन शिक्षकको सो युनियनमा आबद्ध शिक्षक हरेक वर्ष हिउँदको एक महिने बिदामा नेपाल भ्रमणमा आउँछन् । लाङटाङ, अन्नपूर्ण, सगरमाथातिर पदयात्रा जान्छन् । सक्नेहरु हिमालसमेत चढ्छन् । काठमाडौँ, पोखरा र चितवन घुम्छन् ।

“पदमार्गका कुनै विद्यालयमा शैक्षिक, खेलकुद सामग्री बाँड्ने र देखेको सहयोग गर्छन्, आलापोटमा भने विद्यालय भवन बनाउन सघाए,” प्रबन्ध निर्देशक शेर्पाले भन्नुभयो । अमेरिकाको न्यूयोर्कमा बस्दै आउनुभएका शेर्पा कोरियन शिक्षकको यो समूह आउँदा नेपाल आइपुग्नुहुन्छ ।

आठ वर्षदेखि सो युनियनका १५० शिक्षक नेपाल आइसके । अर्को वर्षदेखि कम्प्युटर बाँड्ने, विद्यालय बनाउने र दुवै देशका विद्यार्थीबीच सांस्कृतिक भ्रमण आदानप्रदान गर्ने सोचमा रहेको टोली नेता जुङले राससलाई बताउनुभयो । भूकम्पपछि कोरियाली शिक्षकबीच आपतका नेपालीलाई केही ने कही सहयोग गर्ने छलफल चलेको उहाँहरुले बताउनुभयो ।

पर्यटकीयस्थल ठमेलमा डेढ दशकदेखि कोरियन खानाको ह्याङकुक सराङ रेष्टुरेण्ट चलाई रहनुभएका चीजमान गुरुङ र सुरज नामग्या वाङ्दी हिमाल आरोहण, पदयात्रा र सम्पदाक्षेत्रको भ्रमणमा कोरियनको आवागमन निकै उत्साहजनक रहेको बताउनुहुन्छ ।

“गाउँतिर सहयोग गर्ने चलन बढेकाले सांस्कृतिक आदानप्रदानसहित जनस्तरमा सम्बन्ध विस्तार भएको छ,” उहाँहरुले भन्नुभयो ।