इनेप्लिज
२०७२ कार्तिक २६ गते १:५२ मा प्रकाशित
तनहुँ, २६ कात्तिक । पर्यटकीय नगरी बन्दिपुरस्थित बाख्रा अनुसन्धान केन्द्र नेपालकै नमुना फार्मका रुपमा विकसित भएको छ ।
उक्त केन्द्रले विभिन्न नौ जातका १६ प्रकारका बाख्राका साथै डाले घाँसको अनुसन्धान गरेर सफलता पाएपछि उक्त फार्म नमुना बन्दै गएको हो ।
सो केन्द्रले जिल्लाको विभिन्न १२ स्थानमा शाखा केन्द्र सञ्चालन गरेर बाख्रापालन र बाख्रा अनुसन्धान कार्य गर्दै आएको छ ।
उक्त केन्द्रले हाइब्रिड पद्धतिबाट बाख्राहरु उत्पादन गर्ने, बाख्रापालनसम्बन्धी तालिम दिने र डाले घाँसको अनुसन्धान र कृषकलाई व्यावसायिक रुपमा उत्प्रेरितका कार्यहरु गर्दै आएको केन्द्रका प्रमुख राम घिमिरेले जानकारी दिनुभयो ।
पहाडी क्षेत्रमा पाइने बोर, जमुनापारी, खरी, वारवारी, सानेन, टोजेनवर्ग, नुवियानलगायतका उन्नत जातका बाख्रा कृषकलाई उपलब्ध गराउँदै आएको उक्त केन्द्रले जनाएको छ ।
कृषकका लागि सो केन्द्रले जन्मदर बढी हुने, छिटो तौल बढ्ने, छिटो बाली जाने, कम रोग लाग्ने दूध मासु दुवैका लागि प्रयोग हुने, आकर्षक र कसिलो शरीर हुने र चाँडो फाइदा हुने जातका बाख्रा उपलब्ध गराउँदै आएकाले कृषक प्रत्यक्ष लाभान्वित हुने गरेको केन्द्रका प्रमुख घिमिरेले बताउनुभयो ।
प्रतिक्रिया