आइतबार, जेठ ३० २०७८
काठमाडौं ०१:४२
वासिङटन डिसी 15:57

पानी बोक्नु पर्दा विद्यार्थीको पढाइ अवरुद्ध

इनेप्लिज २०७२ भदौ ८ गते ४:३९ मा प्रकाशित

जाजरकोट, ८ भदौ । यहाँको एक उच्च माविका विद्यार्थीको पानी बोक्नु पर्दा पढाइ प्रभावित भएको छ ।

जिल्लाको खगेनकोट गाविस– १ दल्लीमा रहेको त्रिभुवन उच्च माविका विद्यार्थीको पानी बोक्नु पर्दा पढाइ प्रभावित भएको हो ।

उच्च माविमा चार कार्यालय सहयोगी भए पनि विद्यार्थीलाई पिउने पानीदेखि शौचालयमा प्रयोग हुने पानीसम्म बोक्न लगाउँदा पढाइ छुट्ने गरेको कक्षा ७ मा पढ्ने छात्रा कैशीला खत्रीले बताइन् ।

विद्यालयबाट आधा घन्टाको दूरीमा रहेको काललाग्यको खोलाबाट पानी ल्याएर माविमा प्रयोग गर्नुपर्ने बाध्यता रहेको छ । विद्यालयमा पिउने पानी नहुँदा दैनिक यसरी नै विद्यार्थीले पानी बोकेर खाने गरेको बताएका छन् । अधिकांश विद्यार्थी आधा घन्टाको दूरीमा रहेको खोलामा गएर पानी लिएर आउँदा पढाइ दैनिक छुट्ने गरेको अर्की छात्रा अनिता खड्का भनाइ छ ।

पानीको अभावमा शौचालय विद्यार्थीले राम्रो तरिकाले प्रयोग गर्न नपाएको बताएका छन् ।
पानीको समस्या आम दल्लीवासीको भएको कारण विद्यालयले एक्लै समस्याको समाधान गर्न नसक्ने बताउँदै आएको छ ।

यो विद्यालय जिल्लाकै दोस्रो पुरानो विद्यालयमा गनिन्छ । कार्यालय सहयोगीलाई विद्यालयको अन्य काममा लगाउने भएका कारण पानी ल्याउने काम विद्यार्थीले गर्दै आएको शिक्षकले बताएका छन् ।

प्रतिक्रिया