आइतबार, असार ६ २०७८
काठमाडौं ०३:५२
वासिङटन डिसी 18:07

सिडिफोर काउन्ट मेसिन बिग्रिँदा एचआइभी सङ्क्रमित समस्यामा

इनेप्लिज २०७२ भदौ ८ गते ४:३८ मा प्रकाशित

तिलोत्तमा (रुपन्देही), ८ भदौ । एचआइभी सङ्क्रमितको उपचारका लागि लुम्बिनी अञ्चल अस्पतालमा राखिएको सिडिफोर काउन्ट मेसिन बिग्रिँदा यस क्षेत्रका सङ्क्रमितले रगत जाँच गर्न सास्ती बेहोर्नुपरेको छ ।

अञ्चल अस्पतालमा भएको मेसिन बिग्रिएको महिनौँ भए पनि बनाउनेतर्फ ठोस काम नभएपछि रगत जाँचका लागि यहाँबाट काठमाडौँ पठाउनुपर्ने बाध्यता सिर्जना भएको छ ।

सङ्क्रमितले शरीरमा सिडिफोर जाँच गर्ने र सिडिफोर आवश्यकताभन्दा कम भए औषधि सेवन गर्नुपर्ने हुन्छ । औषधि सेवन गर्न सिडिफोर थाहा पाउनका लागि अनिवार्य रुपमा जाँच गर्नुपर्ने हुँदा मेसिन सञ्चालन नहुँदा सङ्क्रमित समस्यामा परेका हुन् । तर केही सहजता होस् भनेर अञ्चल अस्पताल बुटवलस्थित एआरटी सेन्टरले सङ्क्रमितको रगत यहाँ जम्मा गरेर काठमाडौँ पठाउने गरेको छ । एआरटी सेन्टरका कार्यक्रम संयोजक धर्मराज भट्टराईले एक पटकमा १०० जनासम्मको रगत जम्मा गरेर काठमाडौँ पठाउने गरिएको बताउनुभयो ।

लुम्बिनी अञ्चल अस्पताल बुटवलका निमित्त मेसु चिकित्सक राजेन्द्रप्रसाद खनालले अस्पतालका सिडिफोर काउण्ट मेसिन बिग्रिएर विगतदेखि नै समस्या भएकाले नयाँ मेसिन माग गरिएको बताउनुभयो । राष्ट्रिय एड्स तथा यौन रोग नियन्त्रण केन्द्रमा यससम्बन्धी जानकारी गराइसकेको अस्पतालले जनाएको छ ।

प्रतिक्रिया