नेपाल आयल निगम पूर्वाञ्चल क्षेत्रीय कार्यालय विराटनगरका अनुसार भारतबाट आयात गरिएको पेट्रोल, डिजेल तथा मट्टीतेलअन्तर्गत डिजेलको आयात तथा बिक्री बढी भएको बताइएको छ ।

पेट्रोलियम पदार्थको मूल्य समायोजन भएपछि हाल पूर्वाञ्चलमा पेट्रोलियम पदार्थको समस्या नरहेको र आयल निगम विराटनगरका डिपोमा पेट्रोलियम पदार्थको मौज्दात पूरा रहेको सो कार्यालयले जनाएको छ ।

कार्यालयका क्षेत्रीय प्रमुख भुवनराज रेग्मीका अनुसार भारतको बरौनी तथा सिलिगुडीबाट आव २०७१/७२ मा तीन करोड ५९ लाख ६८ हजार लिटर पेट्रोल, १२ करोड, ३५ लाख चार हजार डिजेल तथा ३१ लाख १२ हजार लिटर मट्टीतेल बिक्री भएको जानकारी दिनुभयो ।

सोही आवमा आयात भएकामध्ये तीन करोड ५७ लाख २४ हजार लिटर पेट्रोल, १२ करोड २८ लाख ४९ हजार लिटर डिजेल तथा ३० लाख ८२ हजार लिटर मट्टीतेल बिक्री भएको छ ।

बरौनीबाट दैनिक चार लाख लिटर डिजेल, एक लाख ५० हजार लिटर पेट्रोल आयात हुने गरेको र त्यो २५० वटा ट्याङ्करमार्फत ढुवानी भइरहेको बताइएको छ ।

कार्यालय सहायक प्रबन्धक वासुदेव भण्डारीले विगत एक वर्षदेखि मागबमोजिम पेट्रोलियम पदार्थको आपूर्ति भएकाले समस्या नभएको स्पष्ट गर्नुभयो ।

सगरमाथा पेट्रोलियम डिलर्स एसोसिएसनका उपाध्यक्ष रामचन्द्र साहले पेट्रोलियम पदार्थको ढुवानी, बिक्री तथा वितरणमा कुनै किसिमको आयल निगमबाट भेदभाव नभएको र सरल एवम् सहजरुपमा पेट्रोलियम पदार्थ आपूर्ति भइरहेको बताउनुभयो ।

हाल पूर्वाञ्चलमा पेट्रोलियम पदार्थ बिक्री वितरण गर्ने डिलर तथा पम्प व्यवसायीहरुको सङ्ख्या करिब ४५० रहेको छ ।