यस्तै स्वास्थ्य तथा जनसङ्ख्यामन्त्री खगराज अधिकारीले प्रस्तुत गरेको ‘खोप विधेयक, २०७१’ र ‘पोखरा स्वास्थ्य विज्ञान प्रतिष्ठान विधेयक, २०७१’ माथि विचार गरियोस् भनी राखेको प्रस्ताव पनि सर्वसम्मतिले पारित भएको छ ।

प्रधानमन्त्रीका तर्फबाट कानुन, न्याय, संविधानसभा तथा संसदीय मामिलामन्त्री नरहरि आचार्यले सार्वजनिक खरिद विधेयकसम्बन्धी विचार गरियोस् भन्ने प्रस्ताव पेस गर्नुभएको थियो । सांसदले उठाएको प्रश्नको जवाफ दिँदै मन्त्री आचार्यले विकासनिर्माणका काममा लापरबाही गर्ने तथा लगत र समय बढाउने प्रवृत्ति निरुत्साहन गर्न सो विधेयक ल्याइएको बताउनुभयो ।

उहाँले पूर्वाधार निर्माणलाई व्यवस्थित बनाउन विधेयकमा सरलीकृत व्यवस्था गरिएको र केही समस्या भए संशोधन गर्न सरकार तयार रहेको बताउनुभयो । सो प्रस्तावमाथि डिल्लीप्रसाद काफ्ले, जनकराज जोशी, रामहरि सुवेदी, रामनारायण बिंडारी, प्रकाश ज्वाला, भरतकुमार शाह, रामेश्वर फुयाँल, धनीराम शर्मा र अमरबहादुर थापाले आआफ्नो धारणा राख्नुभएको थियो ।

व्यवस्थापिका–संसद्को आजको बैठकमा ‘लैङ्गिक समानता कायम गर्न तथा लैङ्गिक हिंसा अन्त्य गर्न केही नेपाल ऐनलाई संशोधन गर्ने विधेयकसम्बन्धी समितिको प्रतिवेदन २०७२’ र ‘केही नेपाल कानुनलाई संशोधन तथा खारेज गर्ने विधेयकसम्बन्धी समितिको प्रतिवेदन, २०७२’ पनि सदनसमक्ष पेस गरिएको छ । विधायन समितिका सभापति गङ्गा चौधरीले ती प्रतिवेदन प्रस्तुत गर्नुभएको हो ।

त्यस्तै स्वास्थ्य तथा जनसङ्ख्यामन्त्री अधिकारीले ‘मानव शरीरको अङ्ग प्रत्यारोपण(नियमित तथा निषेध) (पहिलो संशोधन) विधेयक, २०७२ प्रस्तुत गर्नुभयो । व्यवस्थापिका–संसद्को अर्को बैठक यही साउन १७ गते अपराह्न ३ बजे बस्ने कार्यक्रम छ ।