सोमबार, जेठ ९ २०७९
काठमाडौं ०३:०६
वासिङटन डिसी 17:21

बालबालिकाका रगतमा सिसा

इनेप्लिज २०७२ साउन १४ गते १४:३५ मा प्रकाशित

bloodकाठमाडौँ, १४ साउन । काठमाडौँ उपत्यकाभित्रका तीन अस्पतालमा उपचारमा आएका छ महिनादेखि ३६ महिनाका ३१२ बालबालिकामा गरिएको अध्ययनमा उनीहरुको रगतमा सिसाको मात्रा भेटिएको छ ।

त्रिविवि शिक्षण अस्पताल महाराजगन्ज, पाटन अस्पताल पाटन र सिद्धि मेमोरियल अस्पताल भक्तपुरमा उपचारमा आएका बालबालिकाका रगतको नमुना परीक्षण गर्दा ९० प्रतिशत बालबालिकामा रासायनिक पदार्थ सिसाको मात्रा र ६० प्रतिशतमा उच्च मात्रा देखिएको तथ्याङ्क नेपाल स्वास्थ्य अनुसन्धान परिषद्ले आज यहाँ सार्वजानिक गरेको छ ।

परिषद्का अनुसन्धानकर्ता डा मेघनाथ धिमाल नेतृत्वको टोलीले ती अस्पतालबाट १०४ का दरले नमुना सङ्कलन गरी अध्ययन गर्दा ३० बालबालिकामा मात्र सिसाको कुनै पनि लक्षण देखिएको थिएन । टोली प्रमुख डा धिमालले भन्नुभयो, “बालबालिकाको रगतमा लेडको मात्रा वृद्धि हुने दर बढिरहेको देखियो । ”

रगतमा देखिने सिसाले बालबालिकाको खासगरी मस्तिष्कदेखि मिर्गाैलासम्मलाई असर पुर्‍याउने चिकित्सक बताउँछन् । अर्कातर्फ खासगरी रङ उत्पादन गर्ने कम्पनीले सिसा नै मिसावट गर्ने गर्छन् । “लिडको मात्रा बढी भएमा खासगरी पाँच वर्षमुनिका बालबालिकालाई भोक नलाग्ने, उमेरअनुसार तौलमा कमी हुने, कमजोर हुने, वाकवाकी लाग्ने र अन्त्यमा मृत्युसमेत हुन सक्छ” धिमालले भन्नुभयो ।

प्रतिवेदनमा खासगरी दलित, जनजाति, सीमान्तकृत वर्गका बालबालिकामा वढी मात्रामा सिसा देखिएको उल्लेख छ । परिषद्का सदस्यसचिव चिकित्सक खेमबहादुर कार्कीले जाजारकोटमा इन्फ्लुयन्जाबाट मात्र सबै जनाको मृत्यु नभएको स्पष्ट पार्नुभएको छ । गत फागुन र चैतमा सो जिल्लामा ३५ जनाको मृत्यु भएको थियो ।

पत्रकार सम्मेलनमा उहाँले भन्नुभयो“ भाइरल इन्फ्लुयन्जाबाट मृत्यु हुनेको सङ्ख्या अत्यन्त न्यून देखियो । ” परिषद्ले सो जिल्लामा भएको मृत्युका कारणका बारेमा अध्ययन गरेको थियो । “एचवानएनवान नामक स्वाइनफ्लुले भन्दा अन्य कारणले मृत्यु भएको देखियो” कार्कीले भन्नुभयो ।

प्रतिक्रिया